Nieu Aemstelredams Liedboek


Op die wyse: Mach reyne liefde vergaen SEer veel moet ick nu lyden Om een die ick bemin Nu en tot allen tyden, En heb ick moet noch sin Om dat ick haer moet deruen Die ic garen sou eruen, sy my goe ionste draecht En my seer wel behaecht. Haer sal ick niet begheuen, Die my wel is bekent Want in mijn hart verheuen Staet sy seer vast gheprent, Al sou ick daerom treuren Ick hoop het sal noch beuren, Al ly ick groote pyn Dat sy noch myn sal zyn. Mocht den tijt noch eens keeren Dat sy mocht worden myn, So sou ick vreucht hanteeren En leuen sonder pyn Want sy can my ghenesen Dus roep ick sonder vresen Om troost met groot gheschal, Vrijt my toch van misual. Och mocht ick toch eens wesen Mijns liefs dienaer soet Soo sou ick zijn ghenesen Van alle teghenspoet, Maer helacy neen ick Ick werd belooghen deerlijck, Van Nijders fel en quaet Die myn brenghen in haet.
[Folio 11]
Nu Princesse reyne, Weest altijt wel ghemoet Ghy weet wel wat ick meyne Ick hoop t'sal worden goet, En laet die nyders vaeren, Soo moghen wy vergaeren Wt reynder liefden claer In dit nieuwe Jaer.