Den minnelijcken roosen-knop

[p. 83]

Tis een lust datmen mindt;
Als men sijn vernoegingh vindt.

Stemme: Philis mijn tweede ziel.

HErderín waer wilt gy heen,

Dat gy van hier gaet treen?

Ach hoort my aen,
En wilt wat blijven staen,
U Schaepkens (dunckt my) komen daer gegaen
Ten sijn voorwaer mijn Schaepkens niet
Die gy daer vande Heyden komen siet;
Want sy noch wel een ure sijn van hier,
Eermen sou konnen hooren hun getier.

2. Moght ick hun Herder sijn

En gy Herd'rin van mijn,
Dan waer mijn hert
Gerust, en uyt de smert,
Ach, Herderin, laet toe dat ick het wert.
Och Herder 't ghen dat gy daer seght,
En weet ick niet, oft gy het mynt oprecht
En oft gy niet met my en haut den geck
Onder de Vryers valt nu groot gebreck.

3. Herd'rin niemant als gy

Ist die behaeght aen my:
Wel gaet dan voort,
O Herder, soo een woort
En had ick noyt te voor uyt u gehoort.
U Schaepkens die behaegen mijn,
Die noyt en sullen ongescheyden syn.
O Herderin! nu weet ick uwen sin.
Dryft uwe Schaepkens vry tē boschwart in