Middelnederlandsche geneeskundige recepten en tractaten, zegeningen en tooverformules

394.

Item jeghen den kancker in den mont, soe seldi nemen een goet deel weghebrede, ende stampense esticken ende vringhet uut met watere uute enen smeebacke. ende dit seldi stampen ende uutvringhen met versschen watere voerscreven, alsoe langhe als daer groen uutloept. ende als daer niet meer groen uut en loept, soe seldijt doen te viere, ende in den stoep waters soe seldi doen alluen⁽³⁾, een hoendereney groet. ende⁽⁴⁾ als ghijs hebt .iij. vierendeel⁽⁵⁾, soe seldijt sieden op een vierendeel⁽⁵⁾; ende alst ghesoden es, soe seldijt laten coelen. ende alst coel es, soe seldijt den mensche⁽⁶⁾ doen in sinen mont houden alsoe langhe als hi mach; ende als hijt niet langher houden en mach, soe spuwt⁽⁷⁾ uut, ende neem daer veersch⁽⁸⁾ in. ende dit sal hi doen enen dach lanc, ofte .ij. daghe lanc, toot het es ghenesen. ende dat sal sijn op een kort.

(3) Hs. allwen.

(4) Hs. ende ende.

(5) In het hs. voluit.

(5) In het hs. voluit.

(6) Hs. mesche.

(7) Hs. spwt.

(8) In het hs. verbeterd uit weersch: het eerste been der w is doorgeschrapt.