Middelnederlandsche geneeskundige recepten en tractaten, zegeningen en tooverformules

54.

Item omme alle cyrope te claersene, soe siet anderwerf met den zuker; ende als die zuker ghesmolten es, dan doet van den viere ende laetet coelen, ende doeter in .iij. of .iiij. witte van eyeren, ende breecse wel cleene; ende dan doet weder upt vier ende roeret ghestadelike, tote dat heet es; so sal dat witte met ziere waechede boven commen, so sal dat cyroop sceeden dor dat witte van den eyeren. dan doet noch sieden met cleenen viere, tote dat ghenouch es; dan sulghijt prouven up uwen naghel: blijft die dropel ront daerup, so eist ghenouch; dan claerset zoetelike doer eenen douc, dat witte niet mede dore ne ga. Dit cyroop verdrijft den heeten tercia, ende coelt, ende doet wel slaepen; maer es des smenschen lichame bestopt, so sal hijt niet nemen.

[p. 29]

mer⁽¹⁾ geeft hem cyroop van fiolen: dat laxeert, dat mach de zieke nemen tallen stonden, sonder vreese.

(1) Hs. m'.