Medische en technische Middelnederlandse recepten

1147. Emplastrum Gracia dei maiora vocatum.aant.

Dese plaester gheneset alle maniren van wonden, nyen ende ouden, ende trect wt quade wlesche, ende wynt goede wlesche, ende het gedoghet nyet dat quade constume dervan den ghenaken. Ende confortirt gequetste senen ende ock dy mus op dat sy geswollen is, ende trect wt venyn, ende doet ripen apostemen, ende geneset fistelen ende vule apostemen nae dy dat sy gesvuert syn, so doet coude borsten dy wyt toe braken syn, ende het ys goet ten apostemen dy vallen⁽⁴⁰⁴⁾ in juncturen.

Recipe betonie, verbena, rode murre elx s ℔., weel scone gedwogen ende gedroget vanden water, dan stamse ontwee ende doetse yn eyn pot myt .ij. stop wyns ende versiedent den pot wel gestopt ende⁽⁴⁰⁵⁾ gewacht van ouerlopen tot op dat .iij. deel. Dan salmen dar yn doen als geparst wyt spaens was .iij. , wytte hars .4. (fol. 107^v) in cleyne stucken daer yn gedaen. Ende alst wel gesmouten is ende wal ghemen[g]t altoes rorende, dan stellet vanden wuer ende doet daer puluer van masticken [in] .2. Ʒ, altoes rorende, dan doet dar yn terpentyn .j. ℔., ende roret tes dat coude is, dan so bestedet yn een ledere sacke.

(404) vallen: verbeterd uit avallen.

(405) Na ende staat in het Hs. w doorstreept.