Medische en technische Middelnederlandse recepten

724. Aqua yrundina sic fit.aant.

Recipe jonghe swaluen, ende barntse to puluer, ende dan menghet mytten puluer castorie ende eyn luttel azijns, ende doet yn eyn klocke ouer tfuer ende sublimirt water dar wt. Dy[t] water heft mennighe schone virtuten tegen dat grote ouel nuchteren gedroncken, op hem seluen soe geneset van wat nature dat het sy. Item het verdrift frenesy ende fledersin ende geneest dy ghenen dy yn tysika leggen ende maket bouen allen (fol. 60^r) dinghen guede hersen ende suuert dy maghe ende suetet dy borst ende confortirt dy senen ende trect wt alle dy wortelen vander gycht ende merret natuer. Ende verhettet dy vercolt syn van naturen, ende coelet dy altoe heet syn van naturen. Dyt water nuchteren gedroncken myt ysopen, werdrift dat witte water ende den daghelixe corts. Mer als dy vrouuen kynder dragen, soe motten sy hem huden van desen water want⁽²⁷⁸⁾ dy frucht⁽²⁷⁹⁾ solde verloren bliuen. Ende verdrift alle hoeft zwer myt ysope gedroncken, ende doet wel slapen ende wel vryn maken ende dy spise wel verdowen, ende wel ter cameren gaen. Ende doet haer af gaen daerment op vriuet sonder enich weder wassen.

(278) want: het Hs. heeft wantte.

(279) frucht: het Hs. heeft fructh.