Medische en technische Middelnederlandse recepten

670. Aqua philosophorum sic fit.aant.

Recipe ysope, polioen, gariofilaet ende sukerey ana⁽²²⁹⁾ ende dyt tgader gedaen yn een eerde clocke ouer tfuer, ende daer wt water sublimirt. Dyt heft grote craefte ende virtuten. Alsoe dat dye ghene die dat grote ouel wyl (fol. 52^v) genesen, soe dats die mensche nummermeer een hebbe, van wat nature dattet sy of van welker complexien. Al haddet dye mensche gehadt .c. iaer he solde genesen bynne[n] .xl. daghen.

Item neem beuenelle, rute, petrocilie van alexandrien ende zeduaer, aloe ende calmyn⁽²³⁰⁾ ana⁽²³¹⁾. Dit saltu ontwee vryuen ende syedent al tsamen in aqua philosophorum op dat derdendeel. Daar nae saltuut wt doen ende wringhet doer een doeck ende hanghet yn⁽²³²⁾ een fiole van glase wal gestoppet. Ende .ix. daghen daer nae salment gheuen drincken dy ghene dye dat vallende ouel heft elx morgens nuchteren tot .xl.⁽²³³⁾ daghen lanck dit is dye warachtiche medecyn dye gevonden was teghen sulke syecheit.

¶ Item. Aqua philosophorum gedruncken nuchteren doet allerhande pledersiin wergaen ende zuct. Ende confortirt des mensches senen bouen alle dinghen ende geneset alle dropen. Dyt water gesoden myt castorie ende dat dickewyl nuchteren gedroncken, dat is gude medecyn teghen dye yecht. Ende teghen fistelen saltu maken een plaester van werck ende nettent yn dat water, ende leggent daer op, ende geuent hem drincken. Ende vermakent twee werf des daghes. Et est optima contra morsus venenatorum animalium si cataplasmetur cum ista aqua. Et curat ycterioram potates nouem diebus. Et si ter bibetur in accessu febris vndecumque venerit fugat eam. Item dit water maket den mensche quit ende gans vanden witten ende roden water, yst dat men nuchteren drincket.

(229) Na ana werd de gewichtsaanduiding vergeten.

(230) Na calmyn staat van doorstreept.

(231) Na ana werd de gewichtsaanduiding vergeten.

(232) yn: het Hs. heeft dyn met doorstreepte d.

(233) Na .xl. staat dag doorstreept.