Medische en technische Middelnederlandse recepten

667. Een ander manyr om brande wyn tmakenaant.⁽²²¹⁾.

Aqua vite dat is lewende water of water des leuens. Men maket aldus. nemt eyn pot dy bouen enghe is ende beneden wyt, ende doethem vol vanden beesten wyn den ghy krigen cont. Ende set op den pot den helm, dattet wel slutet op den pot, dan lemet tgader met blommen getemperret mytten wytten vanden eye, ende myt eyn lynnen cleet, daer nae settet opt fuer, ende doet siden altoes, ende ontfanct dat daer wt comt. Ende alst lange gesoden heeft, soe suldi hem pruuen, oft het water bernen wyl of nyt want naemt ghy langer, het solt al dat ander oneren. Aldus pruftmen: meen steecket yn enen lynen doeke, ende dat steket men dan aen eeyn bernende kers, ende wachtet weel van den roke. Ende dar nae werpet wt dat inden pot ys gebleuen, ende suuerten, ende dan doter dyt water weder ijn, ende settet den alembic weder op den pot. Ende dair settet den pot daer weder opt fuer ende distilirt anderwerf ende onfanct als vorscreuen is yn eyn schoen vate. Aldus sul dy hem distiliren .iiij. of .v. mael ende doet dan (fol. 51^v) yn een suuer vatken. Item distillirt toermentille, pimpenelle, diptannus, scabiosa, elx sonderlinge ende dan vergadert vanden water elx euen⁽²²²⁾ vo<e>l ende drincket. Dat ist beest inden scriften ende tegens fenyn.

(221) Naast dit opschrift staat in de kantlijn: de Aqua vite.

(222) euen: het Hs. heeft euel.