Medische en technische Middelnederlandse recepten

639. Om gesulte noten thoe maken.aant.

Item inden iaer als dy vruchte⁽²⁰⁵⁾ vrou tho commen, so salmen dy noten af breken achte daghe voer translacionis maertinj. Ende als dy tijt ende vruchte laet commen, so salmen dy noten af breken .viij. daghe nae (fol. 47^v) translacionis maertini. Ende men salse nyt scellen of wt dy boelster doen, mer alsoe als sy ghewassen syn salmense laten. Ende elken noet salmen thoe waers ende thoe langhes doer boren cruyswijs myt enen wapen prime. Ende dy noten darmen resistencij yn vynt yn dat doerboren, ouermits dat sy bynnen hart wan hout syn, dy en doghen hijr thoe, die werpt van dy. Ende die men lichtelick doerbort dy syn goet. Ende als dy noten doergeboert syn, so salmense leggen yn water .iij. weeken lanck. Ende alle auent dat water weruarschen, dat dy bitterheit wt dy noten trecket bynnen dy .iij. weeken. Tenden dese .iij. weken salmen die noten in schoen water doen yn een schoen metalen ketel of coperen, ende daer yn syden also langh dat dy walme dry of .iiij. mael daer ouer loept. Dan nemtse wt ende latse wintdroghe woerden. Ende dan soe salmen dy gaten van dy noten vool steken van puluer van zinziber ende caneel puluer. Dan salstu hebben gescumden honich, ende dat salmen syden yn een schone metale ketel of panne of copere, ende dy noten daer yn gedaen, ende sydense ter tijt thoe, dat sy weeck gnoch syn. Dan so cruytmense myt zinziber, knel, nagelen, greyn, folien, etc. Ende dan gietmen thant wtten metael vate yn eyn werglaesde teste, ende latet staen of men slaetse in commekyns. Ende alst langhe staet, so plach dij honich weel waterachtich bouen te warden ende dunne. Dat betertmen aldus dat het net meer eyn gesciet. Men nemt dy honich wt, ende dat honich ghietmen yn enen schonen metalen ketel, ende menghen daer yn wat terwen blommen of meel vander blancsten, dat

(205) Na vruchte staat tho doorstreept.

[p. 205]

het wael ghemenghet sy, ende dan so laet se syden tot dat dy wochticheit versoden is, ende tot dathet tho pas dick ys. After dy tijt so salt nyt meer waterachtich worden bouen ende sal altijt yn eyn busse dicke bliuen. Item tot .c. noeten salstu hebben .iij. menghelen honichs.