Medische en technische Middelnederlandse recepten

(fol. 47^r) Incipiunt quedam dicta de diuersis confectis et sirupis et alijs materijs.

638. Thoe maken gronen gengeber.

Recipe van dye snoyels als men dye wyngert snoyt, ende maken dar af asche, ende van dy asche loghe aldus. Recipe warm water dat nyt en sidet ende worpt dar yn dy asche vorseit, seer weel rorende op dat het loghe worde, ende dan laettet claren. Ende yn deser claer loghe doet desen gengeber dat sy weeken mach. Mee[r] erst salmense scillen, ende men weiketse bynne .ij. weeken. Men sal weteen dat men daer alle auents werse loghe op ghiten sal; meer eermen dy olde of ghitet, so salmen dy gengeber weel wriuen ende wasschen tusschen dy hande myt dy loghe, dy daer alden dach op gestaen heeft, ende dan salmen dy af ghieten, ende ander weder op ghieten. Ende hier moetmen eerst wael loghe van maken. Ende als hy genoch geweyket ys, soe netet dy zinziber ende wast hem weel in wyn of yn roeswater, op dat si nyt sout en sy noch een smaket van dy loghe. Ende dan suldi hebben weel gescumt honich, of suker gheclarificiert, di suldi heeten myet sieden,

[p. 204]

geghoten yn een schoen werglaesde teeste, ende doet daer yn we geweechte zinziber ende latent tsamen so couden. Ende doent dan yn dy vaten dy ghy wylt.

¶ Sommighe seggen dat dy wortelen van onser vrouuen zegel dynt yn dyt syrop van dy grone gengeber, ende dat hy dy syrope gheuet oer verue ende oeck hoer smaeke. ¶ Aldus bereitmen dy woertelen worgeseit van onser wrouuen seghel, dat is satirion of yrogi. Men maectse scoen myt een messe gelick men doet dy petercely woertelen, ende ock soe snyetmense aen stucken, ende men sydet dy stucken dat sy weyte worden ende dan doetmen dat harde wt oft holt waer; dat men yn dy wortelen wynde als sy gesoden syn ende dat daer weeke is, dat wrieftmen cleyn ende menget myt dy syroep van dy grone gingeber.