Medische en technische Middelnederlandse recepten

536. Dy werue machmen aldus.aant.

Ghy sult in dy wellen doen olde pijsse wel gesoden also langh als sy scumet. Ende gi sult doen tot .c. fellen .xx. maten pysse, ende latet dy syen tot .xv. quarten thoe. Daer nae ghitet dy pysse yn eyn schoen cuppe ende laetsy kulen dat sy lau bliue. Dan doet dy selue pysse weder om yn dy ketel, ende laetse siden, ende schumet sy schoen op eyn werue. Ende soe sy beter sidet, soe sy dat laken beter weruet . Ende alst wael ys gesoden soe nemt .v. ℔. weruen cleyn gewreuen ende doetter yn ende latet syden een wirendeel wan eyn wre lanck. Ende also werm als dy pys vanden wuer commet, soe salmense doen yn dy welle. Ock nyt so hete dat sy dij wellen scrimpet. Ende decket dij ketel thoe, ende doet daer yn .iiij. loet alluns, ende latet smelten ende ruret omme. Dan doet dese werue yn dy wellen myt .j. canne of ander dinck van .vj. of .vij. quarten. Ende blaset yn dat fel, ende hout dat gat wel thoe, ende vriuet ende werscuttet weel seer. Ende besiet yn dat gaet of dy werue wael weruet. Dan doet wt dy werue ende doet yn eyn ander fel, als voerscreuen is. Ende wat geweruet is dat ontnadet ende latet droghen weel hart. Dan nemet dy wellen ende maket sy morwe myt water nyt thoe seer, dat dy werue nyt af gaet. Ende dy werue sal altoes bynnen wesen. Ende leggense dan op malcander. Ende dan suldi se weel

[p. 175]

wtreecken ende makent dan alst (fol. 28^r) hort alsmen dair mede wt wyl resen tho merck yn een packe.