Volksboek van Margarieta van Lymborch (1516)

Heo etsijtes die coninc van armenien ghetrout was met margrieten van lymborch. ende hoe die brulocht ghehouden was met groter eeren.

[ 40 ] Dat. C.XVIII. capittel.

ALS hem den claren dach verbaren ghinck ende die weerdighe heren ende die edele vrouwen ontwect ende ontspronghen waren wten slaepe. so was die bruydegom etsijtes die coninc hem selven habijtuerende ende naersteliken cleedende met schonen costeliken habijten. te weten in schoonen gouden lakenen. ende alle sijn heren ende ionckers in gouden paltrocken root fluweel kermosijn daer over om een versieren van sijnder weerdiger bruylocht een rode fluweele carmosine bonette met witte plumagien tot vijftighen toe dwelc seer schoon ende ghenoechlic om te sien was ende plesant voor die weerdige heren ende edele vrouwen die daer vergadert waren. Doen hi ter kercken waert ginc om sijn weerde bruyt te trouwen. so volchden hem inden iersten achter aen die coninc lodewijc van vrancrijc. ende daer nae die keyser heyndric van griecken met sinen weerdighen vader den hertoghe van lymborch. ende daer nae die coninc evac van arragoen. ende daer nae demofoen ende voort alle die ander heeren ende princen alsoot sulcken state wel toe behoort. Ende een yegelijc heer bisonder hadde sinen staet achter hem volgende op haer alder costelicste toe ghemaect een yeghelic nae sijnder weerden ende grootheyt des heeren dien si volchden Die bruyt met haren state die was wel so costelic toe ghemaeckt van habijte ende van costeliker chierragien die sy aen haer lijf draghende was. want margrieta was ooc in gouden lakenen ghecleet mit eenen schonen witten silveren mantele daer over vol fabelen. haer camerieren die waren al in groen fluweel carmosijn seer costelic dat eens herten lust was om te sien. Haer vrouwen die volchden van achter aen seer costeliken ghehabijtueert met menigerhande chierragie die mi te lanc waren om scriven. Inden iersten so volchde haer die keyserinne eresebia met haren state so costeliken dattet een ertsche paradijs was om te aensiene daer nae so volchde die hertoghinne van lymborch haer werde moedere met haren state. daer na volchde die gravinne van Athenen des bruydegoms moeder seer costelic met haren state. ende daer nae so volchden voort alle die ander vrouwen coninghinnen hertoghinnen ende gravinnen. een yeghelic op sijn costelicste ende nae haer lieder state wt wijsende. dwelc mi te lanc rijsen soude om te verhalen hoe elc ghehabytuweert was om tcostelicste. ende aldus so laet ic dat bliven. Ende sal u verhalen voort als si ter kercken quamen ende ghetrout waren als man ende wijf behoorlic is. so wasser een schoon misse ghedaen gode ter eeren ende ter salicheit vanden bruydegom ende der bruyt Als den dienst gods ghedaen was so bliesen die basunen ende die trompetten ende veel ander instrumenten. ende die bruydegom ende die bruyt ghinghen te hove waert daer alle dinc bereet was so costeliken alsmen int herte van eenighen sterffeliken mensche verdencken mochte. Die bruydegom ontfinc sijn bruyt margrieta wel ende chierlick met grooter eeren ende met groter weerden nae die costume vanden hove. Daer ghinghen si sitten ter tafelen elck nae sinen staet. die bruyt voor ende haer moeder die gravinne nae. daer nae die keiserinne eresebia. ende voort aen alle die ander vrouwen coninghinnen hertoghinnen ende gravinnen elc nae haren staet Die keyser heyndric diende sijn suster die bruyt voor. Die vader die hertoge van lymborch ende die ander coninghen ende heeren saten al te samen mit

[p. 143]

schonen state ter maeltijt Die dienaers dienden hem lieden van als planteyt. daer was van als bereet also men wel peynsen mach dat in sulcken heeren hove dient daermen eere te doene heeft. si maecten al te samen ionc ende oudt goede chiere ende waren vol blijschappen ende vol ghenoechten. ende so moeten wi allen oock Die speellieden speelden een ghenoechlic speel die sanghers die songhen daer een ghenoechliken sanck. daer en ghebrac gheen vruecht noch melodye daer wasser ghenoech van alles datmen verdencken ende versieren mochte. Als die heeren princen ende vrouwen ionck ende oudt wel gheten ende ghedroncken hadden so seyde die bruydegom etsijtes die coninc dat sijt in dancke nemen souden hi soudt noch verbeteren ende. XL. daghen open hof houden ter eeren van sijnden bruyt ende van haren lieven vrienden. Die hem te samen grote eere spraken ende hem seer bedancten der eeren die hy hem lieden bewijsende was Als doe die maeltijt op ghedaen was so dancten ende loofden sy god van al dat gheen dat hy hem lieden verleendt hadde. Ende als die gracie gheseit was so ghinghen si dansen ende spelen ende si dansten alder hande hofdansen. ende men bedreeffer ooc menighe schone mommerijen dwelc alte lanc soude rijsen om te verhalen. aldus so laet ic dat bliven om lancheits wille. Die bruyt ende die bruydegom waren te samen ghedaen in een schoon camer. ende die maechden bleven by der bruyt tot des anderen daechs toe dat hijse besliep. Daer af en wil ic niet scriven ende ic laet dat vaten. mer wil verhalen hoe dat alle die weerdighe heren orlof namen aenden keyser heyndric ende si vertrocken elc tot sinen lande daer si thuys hoorden. Die coninc van vrancrijc reysde nae sijn landt. ende evack die coninc trock nae arragoen. Die hertoghe van lymborch reysde met sijnder vrouwen ooc nae sijn landt. Die keyser heyndric sijn sone voorsach sijn vader ende moeder van seer costeliken rijcdome dat my onmoghelic waer om te bescriven. Demofoen die bleef bi etsijtes ende by ysonia sijn wijf als een goet kersten mensche. Aldus schieden alle dese edele heeren van malcanderen met groter vruecht. ende si dancten gode dat si so langhe gheleeft hadden dat si gods lachtere ghewrooken hadden ende ghesont weder keerden nae haer landen. Etsijtes ende margrieta leefden salichliken inden houweliken state ende si storven salichliken. so moeten wi allen. ende nae dit leven versamen in dat eeuwighe leven. Dat ons wil gheven die vader die sone ende die heylighe gheest. Amen.

Gheprint Tantwerpen. Bi mi Willem vorsterman. ..en die Camer poorte. in den gulden eenhoren. Int iaer ....eeren. M. CCCCC ende. XVI. Den iersten dach van ..... er.