Dat. C.XVI. capittel.
ALS den claren dach aen quam so tooch die keyser heyndrick met den hertoghe sijn vadere. ende met alle sijn ander heeren met groter macht van volcke ter poorten wt. om strijt ende velt te leveren den calijffe ende alle sijn ander heeren alst beroepen was. Ende als si ter poorten wt waren ghetoghen so stelden si haer volc in goeder ordinancie om te strijden teghen die payiennen Ende als si in goeder ordinancie ghestelt waren. so reden sy in des calijffes heyr met machte. Ende etsijtes die quam teghen den coninc van tartarien te slaen. ende die coninc stac etsijtes met eenen so swaren steke dat hy noyt sulcken swaren steke en ghevoelde. Maer etsijtes die vercloecte hem ende hi peynsde in hem selven dat moet ghewroken sijn. ende hi verhief sijn sweert ende gaf den coninc eenen slach dat hem dochte dat hem den hemel drayde. daer so vochten si beyde een langhe wijle. Evac vacht teghen den soudaen van damast ende si sloeghen malcanderen dapperlick op haer lijf. Ende die coninc van vrancrijc vacht teghen die amerael van tartarijen. Die keyser heyndric ende sijn vader vochten teghen den calijffe ende den groten ruese so dat dit vechten gheduerde wel drie uren lanc. Etsijtes dus vechtende teghen die coninc van tartarien soude verlast gheweest hebben van sijn ertsiers mer evac die wert dit siende ende hy liet den soudaen van damast varen ende hy sloech met sinen volcke op die ertsiers die etsijtes verlasten wilden so dat sy daer alle meesten deel doot bleven. ende etsijtes die sloech den coninc van tartarien dat hi viel van sinen paerde doot. dies die sarasinen seer bedroeft waren van sijnder doot. Doen so quam die ionghe coninc caspus aen gheslaghen mit sinen volcke. ende hi quam ghereden op demofoen ende hi seide. ghi bekeert verradere sidy daer die vernoyeert ende verlochent sijt aen der kerstenen wet hier sal ic wreken den lachtere die schande ende die blame die ghi onsen god bewesen hebt. ende die doot van mijnen vadere die ghi verradelick vermoort hebt aldus stelt u
om te verweren. Demofoen horende die woorden van desen sarasijn den ionghen caspus hief op sijn sweert ende hi sloech op den coninc caspus eenen groten slach dat hem dochte den hemel waghen so dat hi bicans vanden paerde ghevallen was. ende als hi bequam so nam hy sijn sweert ende sloech op demofoen also vervaerlic eenen slach dat elc int sien verwonderen mochte. Demofoen en faelgierde ooc niet van sinen slaghen. ende hi sloech so dapperlich dat die coninc caspus viel van sinen paerde ende daer wert hi doot geslaghen vanden kerstenen ende alle sijn mede pleghers die met hem waren. Die keyser heyndric ende sijn vader die coninc van vrancrijck ende evac die coninc van arragoen vochten vast teghens haer partye te weten teghen den calijffe van baldac. die soudaen van damast. die amerael ende veel ander machtighe turcken die daer waren met groter macht om die kerstenen te schenden ende te vernielen. Mer god gaf die gracie ende die victorie dat alle die turcken daer meest verslagen bleven. dies die kerstenen seer verblijt waren vander groter victorien die hem god toe sandt Die heeren ende die vrouwen waren al vol blijschappen vander zeghen die si hadden want die kerstenen daer vercregen een overvloeyende rijcdom van ghelde ende van ghesteenten ende menigherhande costelike gouden laken met menich ander costelick iuweel die si met hem lieden ghebracht hadden. Ende die ghene die erm van goede waren. die werden rijck van dat ghene dat si daer overvloedeliken vonden in haer logijsen. Die clocken vander stadt waren al te samen gheluyt van grooter blijschappen. Ende daer was bedreven grote triumphe ende dat ter eeren gods. ende eenen schonen dienst gedaen daer die heren ende vrouwen hem devoteliken toe voechden Aldus was daer elc in groter blijschappen ende in vruechden. ende sonder linghe margrieta van lymborch om dat etsijtes hem so vromelic ghehadt hadde inder bataelgen so verre comen datmen sprac vanden huwelike van etsijtes ende van margrieten heyndricx suster.
Auteursrecht onbekend