Volksboek van Margarieta van Lymborch (1516)

Hoe cleopatrin vlachtende quam by den calijffe. ende hoe die calijffe daer om thierde ende ontstelt was.

Dat. C.XV. capittel.

CLEOPATRIN vluchtende seer mesmaect. is hy ghecomen int heyr vanden calijffe met vele ghevluchter mannen ghewont ende gequetsts. Die calijffe vraechde hoe comt ghi aldus. wat schuylter ende wat is u geschiet. ende waer is die coninck van capadocien. Daer op cleopatrin antwoorde ende seyde doot oft ghevanghen. ende al sijn volc verslaghen. ende ic veriaccht wten velde. ende mijn volc vermoort ende veriaecht. ghewont ende gequetsts. deen oerenloos. dander handeloos. die derde voeteloos. die vierde doot, ende ic ghewont. Doen seyde die calijffe bi den bloede. ende bi den dermen ic sal verwoeden wie sijnse die u desen swaren schade beraden hebben. Doen seide eleopatrin het was een oudt grieck met eenen groten langhen baerde. ende die coninc lodewijc van vroncrijc die heeft gevanghen die coninc van capadocien. ende af gheslaghen al ons machte. ende den ouden grijsaert heeft my veriaecht ende verdreven. ende myn volck ganselic af geslaghen. ende berooft al ons artelerije. ende ter stadt inghevoert met gheweldigher handt ende hi seide voort heer calijfe wat raet so gheeft ghi lieden ons nu Doen seiden die ander heeren ende by sonder des conincx caspus sone. heer calijffe wat ist dat ghi daer toe segt. ende ist niet also comen ghelijc ic u gheseyt hebbe. dunct u dat ick lieghe. siet wel toe si sullen ons allen noch te cote driven. ende dat bi haer der lieden subtijlheyt. Die calijffe dit horende achtent seer cleene ende hi seide ic sal den kersten heeren ende princen strijt ende velt leveren also ic belooft hebbe. Alle die ander heeren ende princen die daer waren by den calijffe waren die allen wel te vreden. ende aldus so stelden si hem lieden al te samen in die wapen. teghen den claren dach van morghen dat si strijt ende velt leveren souden den kerstenen heeren ende princen. Sy maecten haer perc bereet ende om groevent daer si op wijcken souden hadt van noden gheweest. Ter wijlen dat die heydenen te rade waren so ontwaeckten die kersten heeren ende princen diese bevochten hadden. ende die vrouwen hadden haer bancket ghercet. Daer haelden si die heren ende die princen ende deden hem goede chiere aen van al dat ghene dat hem lieden van node ende behoeflic was. ende dat der herten medesinael was ende si waren vrolic. Ter wylen dat si aten ende droncken so maecte die keyser heyndric gereetschape met sijn ander heren ende edele mannen die hi hem waren om strijt ende velt te leveren der satasinen ende der heydenscher honden.