Want u liefde die is profect ghesneest
Int herte reyn amorues ghestichte
en belcht u niet al valt mijn ionst op slichte
u ter eeren sal ic tkersten gelove aen verden
Mijn bedruct herte ic nu verlichte
Demofoen prince van groter weerden
Boven al dat levende is op der erden
Moet ic mijn liefde tuwaerts draghen
En wilt niet meer claghen
Mijnen wille die gheef ic in u acoort
Als herte in herte vereenicht woort
Altijts in eeren so daer toe hoort
Ic en ghere niet anders blome verheven
Ic sal u trouwen met groter eeren
Dies sal ic u hier te pande gheven
mijn trou ende het kersten gelove aen cleven
Daer alle duechden by vermeeren
En alle mijn afgoden te nieten keeren
Iolijt profijt moet dies ghebueren
Schoon lief mijn grief is al ghedaen
Dijnen troost verlost verdriet en trueren
Iolijt profijt moet dies ghebueren
Die mint die kint nae der natueren
Waer den wille al stille zijn stat wilt slaen
Iolijt profijt moet dies ghebueren
Schoon lief mijn grief is al ghedaen
Dus laet ons met vruechden ter maeltijt gaen.
ALDUS ghinghen dese twee ghelieven ter salen waert ter maeltijt. daer groote blijschap was ende grote vruecht. Die keiser heyndric die hiet demofoen feestelic willecome ende deden sitten bi sijnder siden. Ysonia die ginc bi die vrouwen sitten aen die keyserinnen tafel. Als demofoen gheseten was by alle die heeren ende princen. ierst die keyser. die coninc van vrancrijc. die coninc van arragoen. die coninc van costrin ende die coninc van lubien. ende sijn neve amynijus ende ander princen dier saten so seyde demofoen. ghi heeren al te samen ic danc u met ganser herten als dat ghi my ghespaert ende bevrijt hebt vander doot inden strijt daert campelic ende seer aventuerlic met mi stont. al so mijn beminde eerweerdighe heeren ter eeren der edelheyt die ghi my ghedaen hebt ende bewesen aldaer in mijnder noot so sal ic dat heilighe kersten ghelove aen nemen ende doen my doopen ende dat ter eeren van u allen. ende ter liefden des conincx dochter van salenten die over schone ysonia. Als dat heyndric die keiser hoorde ende alle die ander coninghen ende heeren waren si seer blijde ende seyden. heer demofoen ghi doet seer wel. ende twerdt ter salicheyt uwer sielen dat ghi laet varen dijn onghelovich leven Doen vraechde demofoen houdt amynijus neve sidy oock ghevanghen onder dese heeren ende princen. dats u veel ghelucx. want om uwen wille is alle dorloghe gebuert. ende door mijnen broeder diet betaelt heeft metter doot. Doen seide amynijus demofoen heer oom ic kenne dattet waer is. maer dies niet te min u broeder mijn oom die soudaen van babilonien die was die rechte cause ende oorspronc van desen want hy wilde dat keysserrijcke winnen van constantinobelen. ende my daer in setten als gheweldich keysere met des outs keisers dochter eresebia die nu die keiser heyndric van limborch ghetrout heeft dat my wel behaecht. ende ic wilde wel dat si mi wouden stellen ter rantsoenen. ende dat ic mocht reysen nae babilonien. Daer op dat demofoen antwoorde ende seyde. siet neve amynijus
wilt ghi wel doen. so laet varen ons goden. want ghi siet doch wel dat sy cracht noch macht en hebben. noch gheen viertuyt/ rooke noch smake en hebben mer tis een duvelderije. iae bi der kerstenen god. die de kerstenen macht verleent heeft te vernielen / mijneeren ende te bedwinghen die gheheele macht van heydenisse. ghelijc dat aen ons wel ghebleken heeft. want wi hebben ghehadt thien mannen teghen eenen. ende si hebben ons bedwonghen. Aldus neve wildy
Auteursrecht onbekend