Volksboek van Margarieta van Lymborch (1516)

Hoe etsijtes vader ende moeder hem te hove quamen besoecken om te besien hoe dat hi voer. ende hoe sijn moeder etsijtes badt dat hi haer wilde vergheven haer mesdaet.

Dat. XCIJ. capittel.

ALS etsijtes vader ende moeder verhoorden dat hy des lants van armenien mach-

[p. 95]

tich was. ende gheweldich coninc ghecroont int lant. so saten si op ende si reden derwaert met seere schoonen state van heeren ende van vrouwen. so lange ende so vele rijdende dat si quamen int landt van armenien. etsites die coninc vernam dat sijn vader ende sijn moeder quamen. hi sadt op met sijn edele. ende heyndric der gelike. ende sy reden hem teghen. Als si quamen een half mijle buten der stadt sach hy sijn vader ende moeder comen met schonen state. ende hi hietse herteliken willecome. nae haerder weerden. Daer reden si ter steden waert in. ende doen si in die stadt waren so leyde men den grave opt pallays vanden coninc. ende hadden si te voren ghetriumpheert. si triumpheerden nu thien werven meer. ende dat door die comste van sijn vader ende moeder. Margrieta die was in groten verlanghen waer dat etsijtes bleef. ende si hadde vreese dat hem qualiken gaen mochte etsijtes oft heyndrick haer broeder. Des gelijcx so sorchde eresebia des keisers dochter. ende dat om heyndric van lymborch. want si hem begracijt hadde boven al dat leeft. Ysonia des conincx dochter van salenten die sorchde voor demofoen den riddere. oft hem yet mesquame. al was hij een heydene si hoopte dat hi noch een kersten werden soude. ende dat ter liefden van haer. aldus was elck besorcht voor die sine. Die coninc van vrancrijc hadde oock verlanghen hoet met hem lieden stont ende het naecte seer den tijde dattet bestandt vanden iare wt gaen soude Ende met dien dat si aldus besich stonden so quammer een bode ende bracht hem lieden tijdinghe. als dat etsijtes gheweldich coninc ghecroont was in armenien. ende dat demofoen den ruese verslagen hadde. ende dat si waren opter vaert om herwaert te comene. Als die coninc van vrancrijc dat hoorde. ende die coninc die daer weder ghecomen was wt arragoen. so waren si alle verblijt dattet al so vergaen was. ende si begiften den bode eerlic. ende dat om die goede nieumare. Binnen dien selven tijden dat si dus vrolic waren heeren ende vrouwen so quam die gravinne bi heyndric ende etsijtes ende badt hem beyden verghiffenisse der mesdaet die si gedaen hadde Doen antwoorde etsijtes. iae moeder ist nu tijt dat ghi bekent u mesdaet. als ghy weet haer gheboorte ende haer afcomste. Doen seyde die moedere. sone had ic dat ierst gheweten. ic hadtse duysend werf meer eeren gedaen dan scanden. het welcke dat mi seer leedt is. ende heyndric van lymborch ic bidde u ooc dat ghijt mi vergheeft. ghi weet doch wel onkennisse die maeckt onminne. ende elck moeder siet gaerne eere aen haer kijnt. Heyndric die seyde. ic kenne dat waer is. ende hi seide gravinne vrouwe rijst vander aerden. tis al vergeven. Met deser talen waren si besich ende men ghincker hoveren. daer was oneyndelike vruecht bedreven die. XL. daghen lanc. Als die. XL. daghen leden waren so seide heyndrick van lymborch. ortsa etsijtes her coninc den tijt die naket vanden bestande. het waer groot tijt dat wi weder waren in constantinobelen. om ten securse ende ten trooste der iongher keyserinnen. Demofoen seyde heyndric seyt waer. ende myn broeder die soudaen van babilonien sal seer verlanghen nae mijn comste. Aldus was den raet ghesloten dat si haesteliken vertrecken souden. ende reysen nae die stadt van constantinobelen. also sy ooc daden. want elck maecte sijn ghereetschape so hi chierlicsten ende eerlicste mochte. Als si alle bereet waren so ginghen si doen slaen die trompetten omme te vertreckene. aldus saten si allen op ende namen orlof aen die heeren vanden lande. ende si reden nae constantinobele Onder weghen in wat steden dat sy quamen so was hem groote eere ghedaen ende groote weerde. ende si reden so langhe tot dat si quamen voor constantinobelen. Die keyserinne margrieta ende ysonia hieten dese heeren groteliken willecome. ende die coninc van vrancrijc ooc der ghelike. ende demofoen mede Si ghinghen al te samen te hove daer si bedreven grote melodije. si aten ende si droncken end waren wter maten vrolick. daer was van als planteyt. elck die dranc der liefster een droncxken toe Als si gheten ende ghedroncken hadden so ginghen si hem rusten die ghene die vermoeyt waren vant reysen. Mer etsijtes die bleef by margrieten sitten coutende van amoreusheden ende van reynder liefden die si malcanderen droeghen Heyn-

[p. 96]

dric ende eresebia die ionghe keyserinne ooc derghelijcke. ende demofoen ende ysonia die spraken malcanderen oock toe van der mutsen. ende ysonia die preecte demofoen al om kersten te sijn Heyndric ende die ionge keyserinne eresebia en spraken anders niet dan van houven. Hier met so waren die amoruesen besich wel den halven nacht daer nae ghinc elc in sijn ruste. ende si namen elc vriendeliken orlof aen malcanderen. ende ghinghen te ruste.