Volksboek van Margarieta van Lymborch (1516)

Hoe die soudaen van babilonien ende amynijus haecten nae dat bestant wt soude sijn. ende hoe si verspiers sonden in die stadt om te vernemen oft die heren comen waren dier wt reysden

Dat. XCIIJ. capittel.

DIE soudaen van babilonien hadde groot verlangen om te weten ofte die heeren al weder comen waren in die stadt Amynijus seide heer oom wijldijt weten certeyn ende sonden faelgieren. so sendet eenen verspier in die stadt van constantinobelen. die sal ons wel bringhen een seker tijdinghe hoe dattet in die stadt staet ende wat si doen Dyen raet dochte den soudaen seere goet. ende hi riep sinen verspier die ter stont bi hem quam ende vraechde wat hem beliefde. Die soudaen seide loopt in die stadt van constantinobelen. ende besiet hoe datter staet. ende wat heeren datter sijn. ende wat demofoen mijn broeder doet. ende comt haestelic weder ende segt mi den sin. Die verspier die nam den last aen. ende hi ghinc loopen nae die stadt daer hi haestelic binnen was. als hi binnen der steden was so liep hy al omme ende sach watter schuylde. Hi hoorde groot geluyt van speele. hi sach datmen op alle plaetsen triumpheerde ende ghenoechte bedreef. ende waer hy quam hi sachter vol volcx ende al mannen van wapenen Ende doen sach hi demofoen des soudaens broeder rijende te paerde met heyndric ende etsijtes bedrivende groote triumphe ende blijschap in die stat Niemant en sloech gade op den verspier. maer die verspier overmerckte alle die gheleghenthede vanden heeren ende vander stadt Als hijt over ghesien ende ghemerct hadde. so ghinc hi weder ter poorten wt. ende liep weder na theyr toe daer die soudaen lach. Als die soudaen sinen verspier sach so vraechde hi hoe dat hi ghevaren hadde. ende hoe dattet binnen der stadt ghestelt was. ende wat mer bedreef. Die verspier seyde. heer ende soudaen hoort mi spreken. wat wil ick u veele lieghen daer is die macht van kerstenhede. den fluer van allen princen. Ic sach daer drie machtighe coninghen. ende noch veel ridders ende groote heren seer wel ghemonstert ter wapenen. ende demofoen u broeder die reedt hem vermeyen achter die stat met eenen coninc ende met eenen prince. die voerde des keysers wapen. Si bedreven alle manieren van ghenoechten ic en sach daer anders niet bedriven dan melodije ende triumpheeren. Si achten cleyn al u lieden macht. Ooc hoorde ic seggen dat si die barbarijschen verdreven hebben wten lande van armenien. ende die ruese die is doot. ende etsijtes is daer ghecroneert Als dat die soudaen hoorde so seide hi dats wel ins neckers namen sullen ons die kerstenen altoos plaghen. Amynyus sijn neve seyde. heer oom ende soudaen sijt te vreden. wi hebben noch vercreghen acht coninghen groot van macht XL. ameralen om te wederstaen der kerstenen macht. Leeft hopelic. ic hope die goden die sullen ons gracie geven ende victorie verleenen waer dat bestant leden. wi sullen dan toghen die macht die in ons is. Die coninghen dier comen waren seyden ooc der ghelike. laet sien wat die kersten heeren ende princen vermoghen met haer lieder god. Die coninck van asia sprack doe met op gheblasender herten. ende met eenen fellen toornighen moede. ick sal wreken die doot van mijnen broeder Ende die coninc van capadocien seyde. ic sal wreken mijnen vader. elc swoor daer te wreken sinen vrient die si hier voor tijts verloren hadden. Met desen rade ende ordinancie so ghinc hem elc versien van wapenen ende ghereetschape maken ende versierden eenen raet om der kerstenen qualick varen dat hem lieden allen te quade vergaen sal somen noch wel horen sal eert comt ten eynde van desen.