Volksboek van Margarieta van Lymborch (1516)

Hoe die soudaen van Babilonien met sinen state van volcke bevachte den keyser van griecken met sijnder moghentheit. ende hoe dat die keyser ghewont was.

Dat. LXXXV. capittel. [ 32 ]

DIE soudaen van babilonien mit sinen coninghen. die coninc van capedocien ende flauskus van galyleen cleophus die coninck van cosdrin. die machtighe coninc salant van afrijken ende die coninc caspus elck hadde wel. L. duisent mannen onder sinen standaert ende elck heyr stelde hem int ordene op hem selven. Die soudaen stelde in die vaengaerde die coninc caspus van lybra. ende salant van afrijken. die riergaerde dat was die coninc cleophus ende demofoen des soudaens broedere. Die soudaen metten coninc van galileen hielden hem ter siden gheschaert. omme te sien hoet varen soude. aldus stelden die heydenen haer ordenen. Die keyser van griecken vergaerde sijn edelen bi een ende al sijn volc. Die coninc lodewijc van vrancrijc ende evac die coninc van arragoen ghinghen haer ordene stellen inden naem des vaders des soons ende des heyligen gheests. Inden iersten evac van arragoen die hadde die vaen gaerde. lodewijc die coninc van vrancrijc die tweede. ende die keyser die derde. ende elc stelde sijn volc in die ordene. om te bevechten die vermaledide honden. Die keysere woude die ierste sijn. mer die twee coninghen en wouden dat niet ghedoghen Evac die coninc van arragoen hadde deerste bataelge mit. L. duysent mannen daer nae die keyser. ende daer nae die coninc lodewijck van vrancrijc. Aldus was haer lieder bataelge ghestelt. ende si reden nae haer vianden. ende namen orlof aen die keyserinne ende aen margrieten. die welcke seer droevich waren. ende dat om alle die edele mannen die daer toghen ten strijde waert om taventueren haer leven voor tkersten gelove. Die vrouwen metter ionger keyserinnen vielen op haer knyen ende sloegen haer oghen ten hemel waert ende baden god om gracie ende genade. als dat die princen mochten keeren met lieve weder in die stadt ende behouden reyse mochten doen. ende stercken christus wet. Met desen ghebede stonden si op ende ghinghen op eenen torren vander stadt om te sien hoet int heyr gaen soude Als aldus dese vrouwen waren bedect in eenen torren. elc dede sijn ghebet voor die sine. si saghen dat die honden sterc aenquamen met groter macht. ende die kerstenen ooc der ghelike. Die coninc caspus quam aen met sinen heyr seer sterck versien van alderley wapenen. Daer teghen quam die coninc evac van arragoen mit sinen standaert ontwonden. ende elc leyde sijn lance int arreest. so dat si malcanderen reden int sant aen beide siden Evac die hadde hem seer cloeckelijck. ende alle sijn volc. so dat si veel van des conincs caspus volc versloeghen. so dat die coninc caspus weke nae dat ander heyr toe. dat hem als doen in baten quam teghens evac. also dat evack verlast wert. Doen quam hem die keysere met sijnder macht te baten. ende si sloeghen die honden als dat si ersselden totter siden waert daer die soudaen stont met sinen volcke. Die soudaen dat siende dede slaen sijn hornen ende met groten ghecrijssche quamen si in geslaghen ende met groten rumore. Die coninc lodewijc die dit sach reedt met sinen heeren aen. ende hi dede slaen sijn trompetten. die groot gheluyt maecten. ende hy quam van achter ende sloech op des soudaens volc wel dapperlic roepende christus ende

[p. 84]

vrancrijcke Die soudaen horende dat rumoer wert versaecht. ende si drongen al bi een. ende in dat gedranghe eer si bi een consten ghecomen creech die keiser een wonde in sijn side van eenen amerael. die welcke evac die coninc van arragoen ter stont doot sloech. ende noch vele vanden honden. Aldus vochten die kersten coninghen mit haerder macht seer teghens die vermaledijde turcken so dat si veel edelen van des soudaens volcke dooden. also dat den laetsten die heydenen weken op haer sterckte. ende lieten die kerstenen dat velt Die vrouwen die dit saghen op den toren vander stadt waren seer blijde. ende si vielen neder op haer knyen ende dancten ende loofden gode vander groter gracien ende genade. Die keyser aldus gewont sijnde wert wten heyr ghevoert in die stadt met een deel van sinen edelen. ende die ander heeren bleven noch opt velt. om te weder staen die macht der honden. die doe gheweken waren op haer stercte. Als die heren sagen dat si niet wt en quamen so pilgierden die knechten van wapenen die heydenen dyer bleven waren. Ende si namen haer doden die si hadden ende groevense inder aerden also si best consten. Die knechten ende mannen van wapenen creghen daer een tresoor van rijcdomme ende si voerden den schat in die stadt van constantinobele. Die heeren ende ander mannen van wapenen bleven dat velt houdende. tot dat alle die voetknechten in die stadt waren. ende doen reden si ooc in die stadt. Die keiser bleef ter poorten verwachtende dat grote heyr. ende daer was hi vermaect. Sijn dochter ende margrieta ende ander ioncfrouwen ontfinghen die heeren met groter weerden mer si waren droeve dat die keiser also deerliken ghewont was Men brocht die keyser in sijn pallays ende si brochten hem te rusten. ende die heeren ghinghen bi hem sitten bancketeren. si waren blijde vander victorien. mer droeve omme den keyser ende dat om sijnder quetsueren wille Ende si waren allen seer vermoyet alsoot wel reden was. ende si hadden ooc veel ghewonden ende die ghinghen ende deden hem vermaken. elck vrouwe was blijde vanden sinen. men dede hem allen goede chiere also si best mochten. ende elc versach sinen vrient van dies hem noot was Die soudaen ende die coninghen beclaechden haer groot verlies ende haer grote schade die hem die kerstenen heeren gedaen hadden. ende si meenden dat noch te wreken. ende si deden haer doden over sien. Ende doen si op dat velt quamen daer den slach ghebuert was. so vonden si haer doden al ghepilgiert ende al naect op tvelt ligghen. dies si seer tonvreden waren. si maecten grote putten. ende dolvense daer in Daer wasser verslaghen meer dan. XXX. duysent vanden heydenen. dies die soudaen seer verstoret was. Doen ordineerden si als dat si varen souden aen die kerstenen schepen. ende die verbranden. met desen rade ende ordinancie ginghen si elc in haer tente ende rusten hem. want si ooc seer vermoeyt waren. ende si hadden vele ghewonden iae veel meer dan die kerstenen.