Volksboek van Margarieta van Lymborch (1516)

Hoe etsijtes ende heyndric van venus schieden. ende hoe si te samen reysden na dlant van griecken. bi redenen die welcke dat hem venus seyde.

Dat. LXXXIIIJ. capittel.

ALS den schonen dach hem selven ver-

[p. 82]

baerde venus die goddinne die quam tot heyndrick ende tot etsijtes ende seyde. ghy ridders u blivens en is hier niet langer. ende reyst nae constantinobele want het is grooten noot. hoe soo seyden si laet ons dat aen horen. Doe seide venus die goddinne. hoort etsijtes ende heyndrick te samen. daer is die soudaen carodos van babilonien die heydensche hont die wilt hebben des keysers dochter eresebia voor aminijus sinen neve. ende daer sijn vijf coninghen die metten soudaen aen spannen. also dat ghi daer van groten noden sijt want si doen den keyser groten overlast ende groten hinder ende scade. Als dit heyndric ende etsijtes hoorden so waren si seer bedroeft. ende dat omme des keysers teghenspoet. ende si swoeren beide als ridders van eeren den keyser te helpen tot sinen rechte ende hem tontsettene van den vianden. Venus die goddinne seyde. heyndric van lymborch u is verschenen een bloeme int landt van griecken na dijnre weerden. ende die sal u ghebueren bi uwer groter verdienten. so moecht ghi wel huechliken derwaert reysen Ende ghi etsijtes hoort nae mi u ghetrouwe liefde die sal u ten eynde ooc wel gheloont sijn ende dat sonder twivele Aldus ghi ridderlike gherden gaet ende verstercket christus wet. ende vernielt ende helpt crencken die sarasinen. want het is in u macht. ic weet dat van te voren wel. Aldus schieden si vriendeliken wten berghe van venus. ende cupido haer sone die geleydese totdat si quamen aen die havene van athenen. ende daer schieden si van cupido. ende si vonden daer schepen die voeren nae athenen Etsijtes ende heyndrick saten daer in. si hadden wint ende goet ghetije so dat si binnen dien avont quamen voor athenen daer hi binnen menighen tijt niet gheweest en hadde. Als sijn vader ende sijn moeder vernamen dat etsijtes comen was so waren si seer blijde. ende si ghinghen ende ontfinghen hem met groter weerden. Als etsijtes sijn vader ende sijn moeder aensach so viel hy neder ter aerden. ende boot hem eere ende weerde. ende hi gruetese mindelijc. ende heyndric van lymborch ooc der gelike. Die grave ontfinc sinen sone weerdelic ende die gravinne ooc der gelike. ende si vraechden etsijtes wie dat die ander riddere was ende dat nyeuwers anders waer om dan dat hi die selfde wapene voerde die etsijtes voerde. ende van waer hi gheboren was. Doen antwoorde etsijtes sijnder moeder ende seyde. hi is van lymborch des hertogen van lymborchs sone. ende margrieta van lymborch dat is sijn suster. die ghi in tijden voor leden veel scandeliker smaden ende hinders ghedaen hebt met woorden ende wercken die ghi volbrocht soudt hebben en haddet gedaan door dbeledt van mi ende van evac mijnen ghetrouwen neve. god si daer van ghelooft. dat also gedaen wert Als die moeder dat hoorde so seyde si. o etsijtes sone dats mi nu seer leet dat ic haer nooyt boot smade of hinder van haren live. mer dat moederlike herte sone dat en mach niet lieghen. ic vreesde mi altoos voor darchste. maer ghi hebt mijn moederlic hert verblijt om dat ghi segt. dat die over schoone margrieta is een hertoghen dochter. my is seer leedt met alle mijnder ghedachten dat ick haer oyt mesdede. Doen seyde etsijtes. iae moeder ist nu tijt als ghy weet haer af comste ende haer edelheyt Maer die grave vraechde sinen sone wat hi voren hadde dat hi met heyndrick daer quam. Doen seyde etsijtes. hoort vader heere ghi moet ons versien van mannen van wapenen ende ander volc dat nootliken ende profiteliken is ten strije ende om toorloghen. Wi willen te samen nae constantinobele dat nu seere ghequelt is vanden honden. ende willen den keyser nemen sijn schone dochter eresebia. ende believet god al machtich schepper alder creaturen. wi meenen dat te belettene. ende die honden also te castijen dat hem lieden gruwelen sal van onser handelinghe. Als die grave dat hoorde was hij seere blijde ende hi seyde. etsijtes sone ende heyndrick van lymborch. ic hebbe gelts ende goets ghenoch ende daer toe volc om u lieden te sustineren. ende u bijstant te doene ende mi is seer lief dat ic weet als dat margrieta van lymborch eens hertoghen dochter is. dies ic u heyndric ter liefden van haer bewijsen moet alle eer ende duecht die ic can ghedincken. Heyndrick die danckte den grave seere van der groter eeren die hi hem boot Ende die grave dede vergaderen. XX. duysent mannen om met etsijtes

[p. 83]

ende heyndric te varen nae constantinobele Die gravinne ende etsijtes ende heyndric ginghen ter salen om te banckenteren. ende daer was bedreven een grote triumphelijcheyt. ende dat van coste van spijse ende van drancke. Daer was alle maniere van wilt brade. alle maniere van ghebacke alle maniere van suyckereye ende geleye alsoot tot alsulcken hove behoorlic is. ende alder hande maniere van speellieden. Heyndric van lymborch dochte dat hy was int aertsche paradijs. Ende die triumphe dede etsijtes moedere ter liefden van heyndrick van lymborch om haren plas danc te maken van dat ghene dat si margrieten gedaen hadde. Als die maeltijt gheleden was ende dat bancket gedaen was. so ghinc elc in sijn ruste. tot dat hem verbaerde den lichten dach.