Dat. LXXIJ. capittel.
ALS die ruese broadas suver ghenesen was van sinen wonden. die hem etsijtes hadde ghegheven. so stelde hi hem te gaen nae dlant van griecken Ooc so droech hy met sijns broeders hooft. om den keiser te presenteren also hi ghelooft hadde. Desen ruese waer hi quam, omdat hi so groot was. elck liep wech ende si vervaerden hem van den maecsele van sijnder staturen. Aldus is dese broadas so verre ghecomen dat hi ghenaecte dat landt van griecken niet verre sijnde van constantinobele. daer hi hem henen stelde te gane. so langhe dat hi ghinc als dat hi sach die poorte vander stadt. hy clopte daer aan. ende men liet hem in. ende twas vroech dat die poorte noch ghesloten was. Doen hi in was so vraechde hi waer hi gaen soude na des keysers hof. doen wasser een ende hi seide. gaet met mi ic salder u leyden. ende dat was een van des keysers lieden een aertsier. aldus ghinghen si te samen tot des keisers hof. daer die keyser ende sijn dochter ende margrieta ende ander heeren ende vrouwen in waren. Sy quamen in die sale daer die keysere sadt. die welcke dat verschoot als hy aen sach den groten vervaerliken ruese. ende hi vraechde hem wat sijn begheren was. ende wat hi sochte. Doen seide broadas die ruese heer keyser dat suldi horen. mijn saken sijn duechdelick. ende ic en soecke gheen quaet. ic ben u hyer ghesonden als een prijsonier een ghevanghen man. ende dat hooft mijns broeders moet ick u presenteren tot eender ghiften. Als dat die keyser hoorde ende sijn dochter ende margrieta van lymborch ende alle sijn heeren. so waren si verwondert wie dat den groten rusee verwonnen hadde. Doen vraechde hem die keiser, wie dat hem also bedwonghen hadde. Doen antwoorde die ruese ende seyde. een proper frijsch ionc ridder gheheten bi namen etsijtes. ende hi is des graven sone van athenen. Inden iersten sendet hy u mijns broeders hooft. die hi verwonnen heeft. nochtans so was hy wel. XIJ. cubijten lanc. Ic waende mijns broeders doot te wreken. ende hem in baten te comen. mer met fortsen
so heeft hy mi verwonnen ende bedwonghen hier te comen in uwen handen om kersten te werden. Ende al swaven landt sal mede kersten werden. ende dat door hem die etsijtes heet. nochtans en quammer noyt man so vroom /so cloec te sweerde die ons bedwinghen conste dan hi alleen. Aldus her keiser here begeer ic dat doopsel te ontfanghen. ende kersten te werden. Als dat die keiser hoorde was hi boven maten blijde ende hi seide. her ruese men sal u dopen ende kersten maken. ende ick sal selve u peteren sijn. Ende doe margrieta van lymborch dit verhorende was. dat etsijtes dese groote vroomheit van wapen bedreven hadde. daer om so was si wter maten seer verblijt int herte. ende si wert in lancx so meer ontsteken in etsijtes liefde. ende het was haer herteliken leedt dat hy soo langhen tijt wech bleef. Met deser redenen en noch met veel meer ander woorden die daer gheseyt waren so leyde die keyser den ruese broadas ter salen waert omme te bancketeren. daer hi ghewillich toe was. want hi hadde goeden appetijt. ende een luttelken en mocht hem niet vele helpen. Die heren ende die vrouwen volchden den keiser nae ter maeltijt om te bancketeren. ende nae der maeltijt so ghinck men ghereetschappe maken om des sanderdacehs smorghens den ruese te doopen. ende hi was om sijn grootheit geheten cristoffele nae sinte cristoffel. Aldus so bleef hi daer een poose bi den keyser. ende bi sijn heeren eer hi tot sinen lande waert reedt. Ende hi geloofde ende verbant hem met sinen eedt den keyser ende alle sijn heren. dat hi alle sijn volck kersten maken soude. also gheringhe
Auteursrecht onbekend