Dat. LXXI. capittel.
ALS etsijtes van heeren ende van vrouwen wel ghetracteert was ende si hem goede chiere ghedaen hadden. so wilde hi van hem lieden scheyden. mer die heren ende vrouwen baden hem noch om bliven vier oft vijf daghen. om met hem noch te triumpheren. Etsijtes en dorstet niet wel ontseggen. nier hy en deets niet gaerne. omdat hem europa gheseijt hadde. dat margrieta van lymborch was heyndricx sustere. ende dat hijse al omme sochte. ende dat hem geseyt was dat si in athenen was. also hadde Etsijtes veel liever gheweest nae lymborch om te weten. oft die hertoghe otto van lymborch oock waer margrieten vader. ghelijc hem europa gheseyt hadde. Ende als hi aldus staende was in desen ghepeynse. met dien so quam aldaer te hove evac die ridder. ende hi ghinc also hem die weert daer hi ghelogiert was geseyt hadde in die sale. wantter al open hof was. so mocht hy wel ombegrepen ende sonder yemant te vraghen in comen. Als hi int hof quam ende ghinc in die sale. so sach hi daer veel edel mannen. ende menich schoone vrouwe ende ioncfrouwen. ende omtrent dat middel van hem lieden so sach hy staen etsijtes sijn neve des graven sone van athenen die hi. sochte dies hi wter maten seer verblijt was Ende etsijtes die sach omme ende werdt hem siende. ende hi schoot wt dat middele van hem lieden. ende hy hiet evac sinen neve met groter vruechden ende weerdicheden willecome. Die heren ende die vrouwen ende alle die ioncfrouwen die dit saghen verwonderden hem wter maten seere van etsijtes. om dat hi hem so mindeliken was van woorden int aen spreken. ende si seyden. o etsijtes wie is die riddere die ghi so vriendeliken ontfanghet. ist u broeder /u neve/ oft is hi van uwen gheslachte. Doen seide etsijtes. het is mijn vleesch ende mijn bloet. ende hi is mijn nae neve. Als dat die heeren van melanen hoorden, ende europa haer lieden vrouwe. so hieten si evac feestelijcken willecome nae edelheits maniere. ende si ontfinghen hem eerliken Doen seyde europa. waer nu hier heyndric van lymborch mijns
kijnts vader. so waren wi hier nu in duysentich vruechden. Etsijtes seide dat wilde ic wel om dat schoonste ende om dat costelijeste paert dat ic noyt met oghen aen sach oft noyt bescreeet. mer dat en mach niet sijn. Doen seide europa ende die heren van melanen. comt etsijtes ridder met uwen neve evac den ridder. hebben wi hier te voren int triumpheren ende int bancketeren ghenoechlijc gheweest. ende met ganser herten u bemint. ende vrienscap bewesen. ende met onsen oghen op u vroliken ghesien. wi willen nu meer vruechden bedriven dan wi noyt deden Daer bliesen die montfloegten /schalmeyen/trompetten/ claroenen ter maeltijt te comen nae die costume ende ghewoente des lants Daer was gedaen eenen groten kost. als men tot sulcken hove van eeren ghewoenlic is. si aten ende si droncken. si waren vol melodyen. daer was van alle venesoene bereet. Als die maeltijt ghedaen was. ende elc god gelooft hadde. so ghinghen si wandelen inden wijngaert alle ghenoecht bedrivende. van dansen ende van springhen. van morellen van scaecken ende kaerten. als sulcke lieden ghewonelic sijn te doen Evac ende etsijtes werden te samen coutende. ende si vertrocken mulcanderen haer aventueren die hem gheschiet was int dolen. Ende als si allen aldus waren in blijschapen. so vielt wat nats also dat si liepen wten reghen. ende ghinghen ter salen solaes hantieren. ter tijt toe datmen ghinc hoveren. ende een solaeslijc bancket houwen. daer etsijtes ende evac hem heerliken hadde. want
Auteursrecht onbekend