Dat. LXX. capittel.
ALS evac langhe gedoelt hadde nu hier ende daer. deen landt op ende dander lant neder. ende die
een stadt voor besien ende die ander nae. ende also is hi ghecomen int lant van melanen daer hy in die stadt van melanen in een schoon herberge gegaen is. om daer te rusten ende goede chiere te maken. Die weert van den huyse dede hem een schoon camer, ende hi bracht hem spijse ende wijn. ende doen hi wat gheten hadde. so riep hi die weert bi hem. ende hi vraechte hem ofter niet nieus en was in deser stadt van eenighen saken van vreemdicheden Die weert antwoorde doe. ionc heere iaet. hier is wat vremdes gheboert in corten daghen. dat niet seere lanc leden en is. Evac vraechde doe ende seyde. lieve heer weert wat is dat. laet my dat horen want wi ionghers als wi wten lande reysen. so horen wi alte gaerne wat nyenwes. ende als wij dan in ons landt weder omme comen dat wy dan dat vertellen mogen voor goede exempelen. ende dat wi daer door den tijt van recreacien moghen mede toe brenghen. Die weert horende evacx tale ende begheerte seyde. ionck heere en belcht u niet. ic sal u vertellen een vremdt stuc. opdat u niet en verdriet int aen horen Evac die scide. neen segt op ic bids u. Die weert seyde. hyer is ons vrouwe vanden lande europa. ende haer oom wildese verongheliken ende versteken vanden haren ende van dat hertoochdom beroven. Ende doen quammer een ridder ende hi verlostese vander saken. ende si werdens eens also dat hi aen haer wan eenen ionghen sone. ende hi ghinc voort dolen om te soecken sijn suster. Het leet eenen tijt ende ons vrouwe troude eenen anderen man. ende als si een wijle ghehadt hadde. so woude hi dit kint doden ende hi seide dattet was een overwonnen bastaert. Metten corsten geseyt twas op eenen camp gestelt te doene binnen veertich daghen. ende also isser ghecomen een vreemt ridder ende heeft den camp gedaen. dat kint verlost. ende den grave ghedoot. dies al melanen verblijt is. Als
Auteursrecht onbekend