Volksboek van Margarieta van Lymborch (1516)

Hoe elsijtes ontfaen was van sinen vader onde moeder. ende hoe hy heymeliken vertrock ende wech reysde.

Dat. LXIIIJ. capittel.

ALS evac ende etsijtes ghescheyden waren vanden keiser ende van sijn dochter eresebia ende van margrieten van lymborch. so sijn si weder ghecomen in athenen bi den grave sinen vader die hem weerdeliken ontfinc. ende hi vracehde hem lieden hoe dat si ghevaren hadden. om te horen oft waer was dat hem margrieta ontboot metten bode. Doen seyde etsijtes. o lieve vader ende moeder alle eere ende edelheyt is mi bewesen. ende dat door in gheven vander schoonder maecht margrieta van limborch: die my gheinformeert heeft ende gheleert heeft dat ick mi stellen sal tot wercken van eeren. ende bi haren toe doen heb ic verdient den oppersten prijs in den ternoy. ende evac mijn neve den anderen. Als dat die vader ende die moeder hoorden so waren si blijde. iae boven maten alst reden was. want elc vader ende moeder hoort gaerne duecht ende eere vermanen van sinen kinderen. Met dat si aldus in deser talen waren so seyde evac. etsijtes neve volbrenghet nu margrieten begheeren. ghi weet wel wat ic meene. Daer op dat etsijtes seide. dat wil ic gaerne doen. ende hi viel op sijn knyen ende seide. o vader ende moeder heb ic u noyt yet mesdaen. in woorden oft in wercken oft in daden oft in achter sprake. ic bidde u herteliken dat ghi mi dat vergeeft om gods willen. Die vader ende die moeder dit horende seiden o sone staet op het is u al vergheven. Ende die moeder seide doe weder om. o lieve sone heb ic u oft margrieten yet gedaen. dat u oft haer te nae gegaen is dats mi leet. Etsijtes ontvielen die tranen wt sinen oghen ende seide. o moeder het is u al vergheven. ende dat om margrietens wille die mi gheschoncken hevet dese wapene. die ic eeuwelic dragen sal ter lieften van haer. ende wercken van wapenen hantieren. Die vader seyde sone wat wapen macht wesen. het is eenen rooden leeu den stert ghespleyt thooft ghecroont mit goude in een silveren velt. si is seere schoone mer si is mi onbekent. Doen seyde etsijtes. vader si seyde my datse die liefst droech naest gode die si noyt sach. ende daer in murmereer ic seere. ofte si een ander liever heeft dan mi. Doen seyde die moeder van etsijtes. lieve sone het mach licht haers vaders oft haer broeders wapen sijn die si draghen. Doen seyde die vader ende evac. u moeder seyt al waer. Met deser talen ghinghen si te hove om te bancketeren. ende etsijtes die ghinck mede om hem te vermaken met sijn vader ende moeder in die sale. ende alst gheten was so ghinc elc in sijn ruste. mer etsijtes die bleef op sittende in sijn camer. omdat hi heymelijcken sonder yemant te weten wech rijden woude. dats sijn vader ofte sijn moeder ofte evac niet weten en souden ofte die ghene die int hof waren.