Dat. LXIIJ. capittel. [ 27 ]
ALS den avont gepasseert was. ende den dach aen quam. so sloeghen die trompetten dat hem elc bereyden soude ter banen te comen. om prijs ende eer te behalen nae den dienst. Als dat die heren hoorden ghinghen si misse horen ende aenbaden gode. so elck schuldich is van doene. eer hi yet bestaen sal. Ende doe den dienst gedaen was. doe ghinghen sy ontbyten ende goede chiere maken. Die keyser ende die keiserinne des keisers dochter. ende margrieta van limborch ende ander maechden. heeren ende vrouwen ghinghen ter tynnen. ende hinghen den prijs voor hem lieden. Doen deden die herauten die trompetten slaen. dat elc comen soude ter banen. ende doen sijn beste om prijs ende eer te hebbene. Als dat die edele hoorden so quamen si elc om chierlicste in ghesleghen. inden iersten den gouvernuer van constantinobele. die pallatyn van gernobele. daer nae die markijs van griecken. ende veel ander edelingen. Doen quam etsijtes in gesleghen ende evac sijn neve. ende si waren beyde alleens int harnas. ende haer paerden behanghen met gouden laken. ende met silveren bellen ende gouden bellen. ende wter maten costelijc haer helmmetten vol plumagen hanghende ende met vol gouden paelgen. Daer sloeghen die trompetten op. dat hem elc soude bereyden om ternoyen. Daer sloech die pallatijn op etsijtes. ende etsytes weder dapperlick op hem. ende evack die sloech op den gouvernuer. Ende daer vloeghen die plumagen int sandt. die bardeersels vanden paerden werden met stucken af ghehouwen. Daer hadde hem etsijtes als een hongherich lijbaert. ende evac sijn neve ooc dier ghelike. so wat teghen hem beyden quam dat sloeghen si vanden paerde. mer etsijtes boven al. so dat elc die bane ruymde. ende lietense hem beyden alleen houwen. Doen was den roepe vanden herauten. etsijtes ende evac als verdienders van den prijse. Sy reden wter banen. ende die herauten reden voor hem beyden. ende si convoyeerdense in haer logijs. ende si seyden hem dat si comen souden ten banckette. bi die heren ende bi die
vrouwen. daermen u lieden presenteren sal. elc prijs ende eere nae sijn verdiente. Doen seyden die heeren si dedent gaerne. ende met dien traden si van haren paerde. ende ghinghen hem ontwapenen. ende si stelden hem lieden in costelike habijtuweringe so si alder chierlicste consten. ende also ghinghen sy met haren knapen ende paeygen ten banckette wert. bi den keysere ende bi sijnder dochter ende bi margrieten daer si vriendelic ende eerlic ontfangen waren. Ende die ionghe keiserinne eresebia die gaf etsijtes den gouden sperwaer metten silveren bellen. Ende margrieta van lymborch die gaf evac den rinc metten dyamante. ende aldus waren si beyde beghift. etsijtes metten oppersten prijs ende evac met den anderen prijs. ende daer waren si in groter ghenoechten ende in ontsprekeliker blijschappen. Ende daer was een bode gesonden van margrieten van lymborch aenden grave van athenen ende aen die gravinne. hoe dat etsijtes verkeert was. ende hoe hy die edelheyt hantierde. dies die grave ende die gravinne seer blijde waren. ende sprakens margrieten groten lof. dat si hem daer toe ghebracht hadden. dat hi edele wercken aen veerden wilde. Aldus was sijn vader ende moeder seere verblijt alst ende was. Doen tbancket ghehouden was. ende elc sijn ghenoechte bedreven hadde. so ghinct daer aen een scheyden. ende elc ghinc tot sinen logijse waert ende in sijn ruste. Margrieta was ut om etsijtes te senden in aventueren. ende si informeerde etsijtes met schoonen woorden. dat hi haer beloofde dat hi niet keeren en soude. hi en soude prijs ende eere behalen in feyten van wapenen. Maer eer dat hi van haer scheyde badt si hem eer hi hem stelde ter dolasijen om te soecken aventuer. dat hy gaen soude aen sijn vader ende moeder. ende bidden die verghiffenisse van dat ghene daer ghy hem lieden in verthoornet hebt. god soude u te badt helpen. Etsijtes die beloofde haer dat hyt doen soude. ende aldus so schiet hi ende evac vriendeliken van haer. ende si reysden weder nae athe-
Auteursrecht onbekend