Volksboek van Margarieta van Lymborch (1516)

Hoe Triere ghewonnen was. ende hoe die bisscop veriaecht was vanden hertoghe Otto van lymborch.

Dat. LI. capittel. [ 21 ]

DIE hertoghe otto van lymborch liggende voor die stadt van trier met grooter machten van volcke om triere te winnen. Die hertoghe dede die stadt bestormen ende beschieten met bussen /bomboerden/ ende kartouwen also dat hi die stadt seere schandeleerde. ende veel lieden binnen der stadt quetsten. datter die ghemeente af wert beroert onder malcanderen ende seyden. dit hebben wi te lijden om des bisscops willen. Ende daer om dat hij verriet den ghetrouwen ridder heyndric van lymborch. die nochtans ontquam. ende sloech den coninc van beemen doot. ende den hertoghe van loreynnen. ende reet doen sijnder veerden. ende nu comt die vader ende wilt die wraecke op ons verhalen Doen seyden die sommighe vander ghemeenten. wi wijtent den bisschop mer wi waren allen raders totter saken. ende wi gaven daer ghelije ons consent toe. om dies wille dat wi pays ende vrede hebben souden. ende doen kenden sijt allen eendrachteliken dattet waer was. ende si waren in swaren laste ende in groter sorghen. Die bisschop ordineerde syn heyr. ende hi wilde strijt leveren den hertoghe van lymborch eer dat si stormden. Ende doen ghinc die hertoghe ende ordineerde sijn heyr. ende hi gaf arnout van ardennen die vaengaerde ende den standaert in sijnre bewaringhe. ende die hertoghe otte hielt die riergaerde. ende aldus stelden si haer bataelgen. Die bisscop toech wt met sinen heyr. ende hi bestelde dat die mueren vander stadt ten iersten besedt waren van volcke. ende die trommelen ende die trompetten ghinghen op. ende si quamen aen malcanderen. ende daer bleef een grote menichte van des bisscops volck Arnout van ardennen die dreef den bisscop te rugghe. also dat hi wijken moste nae die stadt. ende sijn volc wert seer ghewont. ende aldus dreven sise tot in die stadt toe. Die lymborgers hadden die victorie. ende die triersche die schade. ende die bisschop was sonder moet. ende hy hadde wel willen pays hebben aenden hertoge van lymborch. ende hi en wister niet aen te gheraken. Hi seynde sinen herant aen den hertoghe. ende sijn ambassaten. om een maent bestant te hebben. ende om te tracteren binnen dier tijt van payse. Inden iersten die commelduer van triere. ende die domproost van triere die waren dambassaten. ende si namen den last aen, ende si ginghen metten heraut int heyr bi den hertoge diese weerdeliken ontfinc. ende hi vraechde wat dat haer lieden meninge

[p. 45]

was. Si seyden. wi comen hier bi uwer ghenaden ende bekennen dat wi groteliken mesdaen hebben. ende wy begheren een bestant van drye maenden tijts. ofte wi daer en tusschen consten vinden een middele ofte een maniere van payse Die hertoghe van lymborch die verstont seer wel haer lieder tale. ende hi seyde. ghi heren u wercken die sijn seer quaet ende valsch. mer niet te min ic consenteer u dat bestant van drie maenden ende ordineert daer en tusschen alsulcken beteringhe, dat ic gepayt ende te vreden ghestelt ben. als vander verraetscap die ghi lieden. ende u bisscop aen mijnen sone heyndric bedreven hebt. Ende doen seyde hi noch meer. hi was u schermschilt in uwer noot. ende ghi ghinckt hem daer en boven scandeliken verraden tfy u ende u allen diet bedreven hebben Die doomproost antwoorde ende seide o edel hertoge. wy bekennen datter ons wijsheit in faelgierde. ende van alle dat gheene daer wi ons in mesgaen hebben teghen u moghentheyt. dat setten wi ganselijc ende gheheel tot uwen wille ende neemt ons in uwer ghenaden. Die hertoghe seyde gaet by uwen bisscop ende segt hem dat hy sijn beraet neme. ende dat hi wijsheyt soecke aen hem selven ende dat hi beteringhe doe van mijnen sone heyndrie. ofte ic sal sijn landt ende sijn steden vernielen ende bederven. ende hem alle sijn macht benemen. Doen seyden die heren heer hertoghe. wi dancken u der eeren die ghy ons bewesen hebt. ende wi sullen onsen bisschop also informeren ende onderwijsen. dat hi vollenbrenghen sal al u begheerte Ende met desen woorden schieden si vanden hertoghe van lymborch. ende si ginghen bi den bisschop in die stadt van triere daer si den bisscop alle die woorden seyden die si gehoort hadden vanden hertoghe van lymborch ende seyden. Heere hoe wildijt aen legghen, ende wat beteringhe suldy den hertoghe toe schicken voor dat mesdaet dat wi bedreven hebben aen sinen sone heyndric. Peynst doch in u selven. syn macht die valt ons veel te swaer om die weder te staen. want hy heeft onse stadt seer deerliken gedestrueert. ende heeft ons grote schade gedaen met sijnder macht. ende hoe sullent wi maken ende aen legghen Daer op dat die bisschop antwoorde ende seyde. ghi heren allen ic bekenne mi grotelic schuldich in die saken. ende ghy allen met mi. want eer ic tfeyt vander verraderye van heyndric van lymborch wilde doen oft aen veerden. doe vraechde ic u allen oft ghijt mede doen wildet ende pays hebben. daer op dat ghi doen antwoorden ende seiden. moghen wi pays hebben. so waert beter een man verloren dan wi allen. Si en loochenden dit niet. ende seyden dat is waer. ende seyden totten bisschop wat presentacien dat si den hertoghe van lymborch toe souden schicken, om sinen tone heyndrick daer mede te versoenen. Doen sprac die bisscop. men sal hem presenteren sijns soons lichaem op te wegen met goude ende met costelike gesteente Die heeren seiden die presentacie is schone. ende believet u wy sullen morghen vroech bi den hertoghe gaen. ende openen daer hem ons presentacie. ende dat docht den bisscop seer goet. ende alle die heeren ghinghen doe in rusten.