Volksboek van Margarieta van Lymborch (1516)

[ 20 ] Hoe den campe ghesleghen was. ende hoe dat fromont verwonnen was ende hoe dat die suverlike maecht europa verlost was.

Dat. L. capittel.

DOEN den dach aen quam so vergaderden die heren van melanen. om dese twee camp vechters wille. ende si dedense bi hem comen. om dat elc sinen eedt doen soude op een cruys. dat haer saken rechtverdich waren. Fromont leide sijn twee vingeren opt cruyce. ende hi swoer ten heyligen dattet thertoochdom van melanen sinen vader toe behoorde ende dat hi douste sone was. ende dat sijn broeder dat landt tonrecht hadde beseten. Daer op dat heyndric van lymborch swoor wten monde vander maecht contrarie van dien. ende dat dat lant der maecht toe behoorde van rechts weghen. ende hoe dat haer vader rechtverdich hertoghe was. Die heeren seiden het is ghenoch gesworen. ende gaet ten crijte. ende elc verwere hem selven. Daer waren vier crijte werders aent crijt daermen campen soude. Ende dese camp vechters waren beide te voet. ende si ghinghen malcanderen ierst aen metter lancien. dat niet langhe en duerde. want heyndrick sloech Fromonts lancie aen twee stucken. Doen ghinghen si ten swerde daer hem heyndric van lymborch so vromelic hadde. dat hi fromont sloech dat hy ter aerden viel in onmacht. Heyndric die dede sijn edelheit. ende dede hem den helm open dat hi lucht hadde also dat hi bequam. doe stont hi op ende quam weder aen. ende hi en wilde hem noch niet verwonnen lijden. daer ghinghen si malcanderen weder dapperlic aen also dat hem een yeghelic verblijde diet aen sach Die crijtweerders haddens lust ende si riepen al op den vreemden ridder dat hi die eere verwerven soude. maer vele wasser die met fromont waren. mer noch vele meer met europa der maecht. also dat die meeste menichte heyndric goede ionste droeghen. Heyndric van lymborch wert moede. want dat duerde seer lanck. ende fromont was noch moeyer. Si ghinghen weder aen. daer sloech heyndric fromont den arm ontstucken. ende hi viel ter aer-

[p. 44]

den. ende heyndric die sloech hem dbeen af dat hi niet weder opstaen en conste. Doen vraechde heyndric oft dlant sijn hoorde. fromont seide neent. het behoort die maghet toe. mer ick hadt gaerne aen mi ghetoghen. ende haer onterft van haren goede. Doen dat die heren van melanen hoorden seiden si tot heyndric van lymborch. doet hem nu dat hi u gedaen soude hebben. ende gaeter mede door. ende slaet hem doot. Doen nam heyndric sijn sweert. ende hi sloech hem sijn hooft af. ende hy quam wten crijte totter maecht. ende daer was heyndric groot eer gedaen omme dat hy die maecht verantwoort hadde. Ende si hadden hem wel willen hebben tot eenen heere. ende dat hi die maghet ghetrout hadde. maer heyndric die en wasser niet toe ghesint. ende si ghinghen goede chiere maken eten ende drincken. ende als den avont aen quam. doen ghinc elc in sijn ruste. Heyndric die was ghelogiert in der maecht camere. ende dese maecht europa van melanen was in liefden op heyndric ontsteken. ende si stont des nachtes op van haren bedde. ende si ghinck hi heyndric onder in sijn bedde. Ende doen heyndric wten slaepe ontspranc verwonderde hi hem. hoe die maecht bi hem onder was comen. mer natuere die wrocht also. dat heyndric haer bevruchte. ende wan aen haer eenen sone. daer men noch wel afhoren sal. Maer dat laet ic nu bliven. ende wil verhalen van heyndricx vader die hertoge van lymborch. die mit sijnder gheheelder machte van sinen volcke voor Triere lach. om wrake te doen van sinen sone heyndric.