Volksboek van Margarieta van Lymborch (1516)

Hoe heyndric ghereden quam int lant van melanen. daer hi eenen camp dede ende een maecht verloste.

Dat. XLIX. capittel.

DOEN heyndric wt den handen was van sinen vianden. so quam hy int lant van melanen daer hi vant een schoon maecht sitten truerende. Heyndric gruetese met soeter spraken. doe seyde dese schone maecht. herridder hebbet danc der huesscher grueten die ghy mi biedt. Heyndric verstoute hem ende vraechde haer waer omme dat si weende ende truerde. ofte haer yet mesdaen was. si antwoorde iaet ende neent. Doen seide heyndric verhalet mi. ist in mijnder macht ic salt keeren wiltmen u veronrechten. daer sal ic mijn lijf voor waghen. Die maecht danctes heyndricken seer ende seide. ic ben des hertoghen dochter van melanen. ende mijn vader is ghestorven. ende nu ben ic een weese ende sonder vader. ende nu is comen mijns vaders broeder fromont. ende hi wil mi dat hertoochdom van melanen ontrecken. ende mi fortselic steken van mijnder orijen. mijn patermonyen goet. ende noch vermeet hi hem dat mijn vader dat lant beseten heeft tonrechte fortselic. dat alle die ghemeente ende edelen des lants contrarie wel weten.

[p. 43]

Aldus wilt hi my fortseliken nemen. ofte ic moet hem leveren twee campioenen die teghem hem vechten sullen. ende verwint hijse so houdt hi dlant ende wert hi verwonnen so blijf ic int besitte. dit is die sake herridder daer ic om truere ende droevich ben. Heyndric van lymborch seide. schoon maecht en trueret niet maer sijt blijde. ic sweer u als een man van eeren dat ic uwen oom selve bevechten sal. ende wreken die fortse die hi u doen wil Die maecht europa dancte heindric seer ende seide, o edel ridder mijn oom waer u veel te sterc hi en vreest niemant. al waerder ooc ses hi soudese bevechten. Nomfortse seide heyndric gods hulpe is meerder dan die sine. ende elc ridder is sculdich weduwen ende weesen te verantwoorden ende te beschermen ende so sal ic ooc doen. ontbiet uwen oom dat hi als morghen ten crijte come. hi salder ghemoet vinden Europa dit horende verblijde in sijn stoute woorden ende si sandt haren camerlinc aen haren oom. dat hi hem bereet maken soude. ende si leyde heyndric in haer pallays. om hem te rusten ende om goede chiere te maken. Ende die camerlinc die ghine daer hi fromont vant haren oom. ende hi grueten weerdichliken. fromont seyde hebt danc. wats u begheren Die camerlinc seyde. hier is europa die maecht van melanen. si ontbiet u dat ghi haer thertoochdom laet met vreden. want si rechte oore vanden lande is. ende si beveelt u ende ghijs niet en doet. dat ghi dan comt vechten morghen vroech tegens haren campioen. Doen seide fromont haer oom trouwen dat moet wel sijn. nae wt wijsen den rechte. mer segt mi camerlinc wie is haer campioen. ende wat mans ist. Doen seide die camerlinc het is een ridder van aventueren. een schoon frisch ionclustich van daghen. fier van moede. ende wel gefaetsoneert. Als dat fromont hoorde seyde hi. al waert die duvel wter hellen ic en ontsaghen niet al quamer seven van sulcken venus ianckers ic en soudtse niet ontsien. gaet ende segt dat hi hem bereet make. ic sal hem morghen vroech comen Aldus ghinc die camerlinc van daer. ende hi droech heyndric die tijdinge dat hy hem gereet maken soude om morgen te campen.