Volksboek van Margarieta van Lymborch (1516)

Hoe arnout quam te lymborch by den hertoge. ende hem alle die geschienisse van sinen sone heyndric vertelde.

Dat. XLVIIJ. capittel.

DOEN arnout quam tot lymborch in die stadt. so ghinc hy opt hof daer die hertoge was ende sijn vrouwe ende alle die heren. die hi vant in die sale. hi booch ter aerden. ende gruete den hertoghe ende alle sijn ghesinne met soeten woorden ende huesscher spraken. Die hertoghe van lymborch namt danckelic ende seide. herriddere rijst vander aerden. weest gode ende my willecome. wats u begheren ende van waer comdy. Arnout seide her hertoghe ic come

[p. 42]

van Triere. daer ic ghedient heb den bisschop. met heyndric van lymborch uwen sone. die wonderlike aventuere ghehadt heeft also ic u verhalen sal believet u te horen Die hertoghe ende die hertoginne seiden te samen. o lieve vrient iaet. hebdi onsen sone ghesien. segt ons doch hoe hi vaert. Arnout seide. hi doet u te samen seer grueten. ende hi heeft in vreesen der doot geweest. ende dat verradelic. Doe vraechde die hertoghe verradelic hoe laet mi dat horen. heeft hem yemant willen verraden si sullent becopen ist in mijnder machten Daer op antwoorde arnout ende seide. here iaet. hi was verraden ende gelevert. daer is die bisschop van trier die wi te samen dienden als mannen van wapenen. Heyndrick u sone door sijn vromicheyt die hi daer thoonde. was generael capeteyn gemaect. also dat wi wt toghen ende verwonnen ons vianden. Ende heyndric u sone vinc den coninc van beemen. ende den hertoge vanden baren. ende hi versloech den hertoge van oostenrijc Doen hi al dese feyten gedaen hadde. so ghinc die coninc van beemen. ende die bisschop van triere. ende overdroeghen met eenen valschen raet datmen uwen sone heyndric leveren soude den hertoghe van loreynen sinen wille mede te doen. die bisschop ende al sijn volc soude pays hebben. daer die gemeente ooc wel mede te vreden was. Ende metten cortsten was daer den raet gesloten. ende die bisscop seyde dat hijt doen soude. Des anderen daghes bracht hi heyndric te velde. daer hi gevanghen was. ende die bisscop trac met sinen volc weder in die stadt. mer eert gheboerde so reet ic wter stadt by die loreynschen om heyndric te helpen. also ic ghedaen hebbe. want daer si hem gebonden hadden aen den tentboom. ontbant ic die coorden ende ketenen. ende gaf hem sijn harnas weder. dat ic met subtijlheit vercreech. ende wapende heyndric ende nam orlof aen hem. Mer eer hy wech trac. nam hi orlof aen den coninc van beemen ende aen den hertoge van loreynen. want hi sloechse beyde doot in die tente. ende is voort ghereden na athenen. om sijn suster te vinden. Die hertoge dit horende wert seer verstoort. ende hi swoor bi sijn hertoochdom. dat hi dat wreken soude op den bisscop van triere. ende hi seide her ridder hoe heet ghi ende wie sidi. ende van wat geslachte. Arnout seide. o edel hertoghe geraert van ardennen dat was mijn vader ende ic hete arnout van ardennen u ondersate wonende in u lant. Doen seyde hi arnout vrient. ghi sult wesen die beleider van mijnen volcke. ic wil den bisscop bethonen dat hi een verrader is. ende niet weerdich. dat hi voert den naem gheestelic Hi beval dat hem alle sijn edelen bereiden souden. ende alle sijn ondersaten. ende dat men bussen bombaerden laden soude. hi wilde nae triere. Sijn gebot was daer ghedaen. ende men ghinc terstont alle dinc bereyden. ende die hertoge ginc ter maeltijt ende arnout moste bi hem gaen sitten. ende daer ordineerden sijt hoe si die stadt van triere belegghen souden.