Volksboek van Margarieta van Lymborch (1516)

Hoe die presentacye gheboden was den hertoghe van lymborch. ende wat dat hi daer op antwoorde.

Dat. LIJ. capittel.

DOEN den dach aen quam. ende den nacht verganghen was. so ghinghen die ambassaten naedat heyr daer die hertoghe van lymborch lach. met sinen volcke. ende si quamen aen sijn tente daer hi sadt in sijn maiesteyt. ende si ghinghen in die tente. ende vielen hem te voeten. ende si baden den hertoghe dat hi horen wilden haer woorden. ende dat wten monde van den bisscop ian van triere. Die hertoge otto van lymborch die sprac. ghy heeren staet op vander aerden. ende sprect cloeckelijc wt al u lieden meninghe ende uwes heeren sin. ende wat sijn goet duncken is Doen sprac die domproost wten monde vanden bisscop. hoort hoort edel hertoge otto van lymborch. moghen wy pays ende vrede hebben van u. ende van die u aengaende sijn. ons bisscop ian van triere is also gedelibereert. als dat hy in beteringe van soenen van sijnder

[p. 46]

mesdaet van uwen sone heyndric van lymborch sal op doen weghen sinen lichaem mit goude ende mit ghesteenten al even swaer. ende hi bidt u oetmoedelijc om al dat liden dat ons heer iesus christus leedt op den goeden vrijdach. dat ghi hem vergeven wilt die daet die bedreven was aen uwen sone heyndric. want dat hi rade vanden coninc van beemen was. O edel hertoghe hebt compassie op die wtstorttinghe des bloets. ende der gheenre die onschuldich daer af sijn, ende wiltet vergeten ende vergheven. ende peynst dat god selve badt aen den houte des cruycen hanghende. Vader verghevet hem. want si en weten niet wat si doen. ons heere die en wilde gheen wrake. Oft hi en begheerde gheen wrake, aldus edel prince ende hertoghe van lymborch bedenct u selven. Die hertoghe horende die weemoedighe tale. ende den groten oetmoet die si sochten seyde hi. vertrect wat. ie sal mi met mijnen heren daer op beraden. Die heeren deden datmen hem hiet. ende ghinghen wt sijnder tenten. in een ander tente. tot dat si van hem een antwoort horen souden. Die hertoghe van lymborch riep arnout van ardennen. ende alle zijn edelen. dat si bi hem comen souden. also si ooc deden Ende doen si allen in sijn tente vergadert waren so vraechde hy hem allen. wat haers sins was. ende hoe datment aen leggen wilde metten triersche. aengesien die schone presentacie die si hoden, ende dat sijn sone noch te live bleven was. Arnout van ardennen die antwoorde ende hi seyde. al presenteert dit die bisschop van triere, die lieden vander stadt van triere die sijn ooc daer in sculdich. laet horen wat si u ooc toe legghen sullen tot uwen costen die ghi ghedaen hebt met uwen volcke. ende beter ist dat si die scade hebben dan ghi. Die hertoghe van lymborch horende arnouts woorden ende sijn reden. seide hi ende over dacht ooc dat die reden goet was. om sijn costen ende sijn verleet gelt weder om in te crighen ende hi dede weder in comen die ambassaten van triere in sijn tente. Dat also ghedaen was tot sijnder begheerten ende si quamen bi hem. ende si deden hem ende reverencie. ende si vraechden hem moghende hertoghe wats u begheerte. Die hertoghe seyde. ghi heren ghi ambassaten. u presentacie van uwen bisscop die is seer wel verstaen. ende si dunct ons goet. Men daer is noch een mare aen. die heeren vraechden hem. wat is die mare. Die hertoghe seyde. dat sal ic u segghen. u bisscop die doet presentacie doen van sijnder mesdaet die hi ghedaen heeft. Waer blijft die presentacie vander stadt van triere. die daer alder meest in schuldich sijn, want hadde die stadt ende dat volc van triere ghewilt die verraetscap en hadde niet gesciet. want si hadden moghen segghen totten bisschop. wi en syn daer toe niet beraden. om den ridder te bederven die ons vertroost heeft Als dit die gouvernuer van triere hoorde so seide hi. heer hertoghe wi sullen ons op dat stuck beraden, metter ghemeenten die daer ooc raet ende daet toegaven. ende u daer af een antwoort brenghen Die hertoghe van lymborch was dat wel te vreden ende die heren schieden van hem ende ginghen in die stadt van triere.