Dat. XLIJ. capittel. [ 18 ]
DES sondaechs nae onser vrouwen dach half oocxt. hadde die hertoge van loreynnen ghereetscap gemaect om die stadt van triere te bestormen aen die een side. also si ooc deden Daer hem die bisscop ende die gemeente vromelic weerden datter veel van des hertogen van loreynnen volcke bleef int stormen. Ende ter wijlen dat si aldus stormeden so was heyndric ende arnout in die were aen die ander siden vander stadt. ende reden mit een deel volcx wt ende sloeghen van achter int heyr. daer die coninc van beemen lach met sinen volcke. Heyndrick die sloech al toe ende aen. ende hy riep lymborch lymborch. also dat si den coninc af sloeghen veel volcx. dat die coninc wijken moste int ander heyr. daer hem heyndric van lymborch nae reet met sinen volcke. ende hy greep den coninc van beemen bi den torsseele ende souden verslaghen hebben. Doen riep die coninc genade mijns lijfs. neemt mi ghevanghen. ic ben die coninc van beemen. ende ic sal u schats ende goets genoech geven Heyndric die nam hem ghevanghen. ende hi bracht hem in die stadt. die tijdinge quam aenden hertoghe van loreynnen. dat die coninc ghevanghen was. daer hi seere droevich om was. ende alle sijn lieden die stonden verwoet. omdat hem heyndric van limborch die grote schade dede. ende overpeysden hoe dat si hem in eenigher manieren bederven mochten. ende pays maken teghen den bisscop. ende aldus was dat heyr seer in beroerte Heyndric die bracht den coninc gevangen biden bisscop arnout die grave vanden baren. ende
Auteursrecht onbekend