Volksboek van Margarieta van Lymborch (1516)

Hoe margrieta den brief vanden bode oversach. ende hoe si weder een antwoorde seynde aen etsijtes.

Dat. XLIIJ. capittel.

DOEN margrieta den brief ghelesen hadde die van etsijtes quam was si verblijt. want si vanter in dat sijn liefde noch niet vercoelt en was. mer in lancx so meer groyende was. daer op dat si hem weder schreef een mindelijc grueten. ende een soetmondige antwoorde. also twee gelieven die malcanderen lief hebben gaerne doen. Si sloot den brief toe die si gescreven hadde. ende si gaf den bode den brief. ende voort beghifte si den bode met goud ende silvere ende si beval hem. dat hi etsijtes seer grueten soude. ende daer met schiet die bode van haer ende seide. ic salt doen. ende die bode liep sijnder veerden. Margrieta die ginc bi des keysers dochter in die sale. ende die vraechde margrieten van waer die bode quam. si seide wt athenen van etsijtes. Des keysers dochter seide dats goet. ende so hebdi troost van liefden ontfaen dat weet ic wel. ende si coosden wat met margrieten Ende als si aldus saten ende boerden mit malcanderen. so sandt die keiser om sijn dochter ende om margrieten. dat si comen souden ter maeltijt so si deden. ende quamen bi den keyser dan si vrolic waren in goder ghenoechten met malcanderen.