Dat. XLI. capittel.
ICK hebbe u gheseit ende ghescreven een luttel vander orloghe van trier dat mer een beghinne en is. nu wil ic verhalen van etsijtes. die in lancx so meer ontstack in liefden. op die overschoone margarieta van lymborch. ende hi en haecte niet so seer om te weten hoe si voer. si en haecte wel also seere om te weten hoe hi hem thieren mochte. daermen nu af horen sal. Etsijtes seyde o evac lieve neve mijn. hoe is mi quellende mijn fantasijen. denckende altoos op die schone margrieta mijns herten lief. of si wel varende is. ende in goeder ghesontheden zijn mach. want mesquame haer yet. dat soude mi aen mijn leven gaen. ofte ic soudet wreken met mijnen bloede. Doen seyde evack heere ende prince van athenen, dat is sonder noot. want si is wel bi den keyser ende seer lief ghetal. ende die keiser heeftse in groter werden. Ende ie weet ooc wel die haer mesbode dattet die keyser selve wreken soude. mer wildi wel doen so suldi haer eenen mindeliken brief scriven om te weten hoe dat met haer is. ende hoe dat u seer verlanget. om tijdinghe van haer te hebbene. Dien raet dochte etsijtes seer goet. ende hi ghinc ordineren eenen brief om haer te senden ende om tijdinghe van haer tontfangen. hoet met haer was. aldus ghinghen si beyde in rusten. Ende etsijtes sende eenen bode in griecken aen margrieten. om te hebben een troostelike tijdinge van haer
Auteursrecht onbekend