Volksboek van Margarieta van Lymborch (1516)

Hoe die coninck van beemen ghevanghen wert, ende die hertoghe vanden baren. ende die hertoghe van oostenrijcke verslaghen was. Ende noch vele ander heren ghewoont. dwelc heyndric van lymborch alleen dede.

[ 17 ] Dat. XL. capittel.

NU sal ic u scriven hoe die hertoghe van loreynen sijn oordene maecte. ende sijn heyr bestierde om den bisscop van triere te bevechten. Den coninc van beemen gaf hi die riergaerde ende den grave vanden baren. ende den hertoghe van oostenrijc die vaen gaerde. ende die hertoge van loreynen stelde hem in dat middele vanden volcke. Ende elc van hem lieden hadden omtrent vijftich duysent volex. xx. duysent paerden. ende xxx. duysent voetknechten. aldus stelden si haer ordene. die bussen ende artelrije tusschen beyden. aldus stonden si gheordent om te verwachten haer vianden. Die bisscop desen groten hoop volex aensiende was vervaert. ende hy hadde wel ghewilt. dat sijn volc niet wt ghetoghen en hadde. zHeyndric seide heer bisscop en verslaet u niet. want die victorie en leit inden groten hoop niet. mer in die hant gods. wilt hi sijn benedictie over ons slaen. wi hebbent goet ghenoech. laet vrijlick aen tasten. ende laet ons bussen lossen alst noot ende tijt is. god sal ons helpen. Met deser talen quamen die vianden aen. lossende haer lieden gheschutte. dat al over ghinck. dweleke die gracie gods was die daer in wrochte. ten hadde anders nie mogelic geweest. daer en soude veel volckes van des bisscops lieden ghebleven hebben. Als doe al dat gheschutte ghepasseert was. ende daer niemant ghewoont en was. doe quam heyndrick ende arnout vromeliken aen. ende sloeghen metten trierschen des bisscops volc in haren hoop. also dat sijer vele versloeghen. Heyndric van lymborch die riep al lymborch lymborch. ende hi sloech die grave vanden baren dat hi ter aerden doot viel. ende daer nae den hertoge van oostenrijcke sinen arm af. aldus braken si die vaengaerde. Arnout riep al brabant brabant. want hi was vanden gheslachte van brabant ghecomen aldus roepende elc sinen roep. quamen si int middel vanden heyr. ende die riepen loreynen loreynen. Als heyndrick dat hoorde ende arnout so riepen si limborch brabant. ende sloeghender vele loreynschen doot. ende dreven den hertoge in

[p. 38]

die riergaerde. daer die coninc van beemen was. Die bisscop volchde altoos achter aen. daer was seer gevochten. meer dan een ure lanck. also dat daer bleven meer dan. l. duysent mannen te voet ende te paerde. iae sonder die ghevanghen waren gewont ende ghequetst. ende al van des hertoghen van loreyns volcke daer bleven omtrent twee duysent van des bisscops volcke. Aldus was dien strijt ghevochten. daer heyndric ende arnout grote eer behaelden. ende heyndric alder meest. dat hem qualic geloont sal sijn int leste alsmen noch wel horen sal. mer arnout sal hem vertroosten wt sijnder noot. mer dat laet ick noch bliven ende sal u wat scriven van etsijtes. ende van evac sinen neve.