Dat. XXXIX. capittel.
DIE barlike duvel die speelt hier mede. datter met een vincxken en comt gevloghen. wel aen mijn knechten, elc stelle hem op sijn hoede. hier int wout van ardennen daer pleghen te passeren cooplieden wt vrancrijc. wt lymborch. ende wt brabant. laet ons alle passagen verspien. Die ander rovers seyden totten cappeteyn vanden rovers wi hebben wat vernomen. siet ghinder in die valleye daer comt een ghereden het sal wat vets sijn. gaewij hem aen also si deden. als hi bi hem lieden quam so namen si hem ende worpen hem vanden paerde. ende si namen properlic alle sijn ghetuych af van sinen live. ende wilden hem binden aen eenen boom. ende laten hem daer staen sterven van hongher. Die ridder badt seer sijns lijfsghenade. mer ten halp niet. Met dien so quam heyndrick aenghereden. ende hoorde dat geruchte ende sach dat si desen riddere dese fortse deden. doen trac heyndric sijn swert wt ende sloech dapperlic inden hoop. also dat hijer een ofte twee velde. eer dat si hem ter weer consten stellen. Ende hi seyde vrient neemt een mes ende slaet mede inden hoop. ende sloech doe so fellic mede datter een deel rovers doot bleven. ende die ander liepen blijdeliken wech om dat si tlijf ontdraghen mochten. Die ridder die dancte heyndric seer om dat hi hem verlost hadde vanden rovers. die hem ghedoot souden hebben. Heyndric seide ic hebt herteliken gaerne ghedaen mer bi orlof moet ic u vragen van waer dat ghi sijt. oft wt wat steden ende hoe uwen naem is. ende waer ghy heenen wilt. Doen antwoorde die riddere ende seide. ic heete Arnout van ardennen. ende gheboren wt brabant. ende ic soude varen te baten den bisschop van Triere. die beleghen is vanden hertoghe van loreynen die welcke den bisschop verongheliken wilt. ende hem afwinnen sijn bisschopdom. Ende wil hem verdriven. ende om te corrumperen ende tot niet te brenghen dat recht der heyligher kercken ende om te setten den bisschop van sijnder officien sonder eenighe saken oft reden Als heyndric dese woorden hoorde so seyde hi. dats
quaet gedaen. ende teghen dat ghebot gods. maer wie sijnse die metten hertoghe aenspannen om hem te verdriven. Doen seyde arnout die ridder. daer is bi den hertoghe van loreynen die coninc van beemen, die hertoghe van beyeren. ende die hertoge van oostenrijcke. die grave vanden baren. dese ligghen al te samen met groter menichte van volcke voor die stadt. Als heyndric dat hoorde so seide hi. herridder ic danc u dat ghi mi dit verclaert hebt. ende ic sal u bi bliven ende met u varen tot hi den bisschop. ende helpen hem sijn onrecht keeren. ende stercken die heylighe kersten kercke. also een yeghelic schuldich is van doene. Arnout verblijde als hi dat hoorde. maer bi orlof her ridder, waer waert ghy op den wech heenen als ghi hier quaemt. ende hoe is uwen name Mettien sprac heyndric ic ben van lymborch geboren. ende ic hete heyndric van lymborch. ende die hertoge otto dat is mijn vader. ende ysabeele is mijn moeder. Doen seyde die ridder arnout. sidy dit heyndric mijn toe. comende prince. ic ben in brabant geboren mer int lant van lymborch woonachtich. ic bidde u segghet mi wat ghi voor handen hebt. ende waer om ghi dolende sijt. Doen seyde heyndric ic soecke een maecht genaemt margrieta, ende is mijn suster. die verloren is also ghi wel hebt horen vertellen. ende nu hebben wi tijdinghe ghehadt datse sijn soude in athenen. Aldus gae ic dolen om daer te sijn. mer ierst wil ic by den bisschop van triere. ende helpen hem keeren dat onrecht datmen hem doet. ende dan so gae ick voort mijn suster soecken die schoone margrieta. Arnout seide. god geeft u gracie dat ghijse vinden moet. ic meende datse over lange tijt gevonden hadde gheweest. mer ick hore wel neens. Aldus quamen si al coutende tot dat si so verre quamen dat si saghen die stadt van triere daer. mer si ginghen die een side vander stadt om daer theyr lach om dien wech te schuwen. ende quamen aen die ander side vander stadt daer si in gelaten waren. mer ierst vraechden die wakers wie si waren. Ende doen seyden si
dat si quamen den bisschop te hulpen ende dat tot sinen rechte. Die wakers waren blijde, ende si leidense tot des bisschopen hof. daer die bisschop
Auteursrecht onbekend