Dat. XXXVIJ. capittel.
DIE hertoghinne van lymborch. ende die hertoghe mede beclaechden seer dat verlies van margrieten haerder weerder dochtere, dat si niet en consten vernemen waer dat si was dan in athenen Daer op dat die sone heyndric antwoorde sinen vader ende moeder. ick en sal niet rusten een ure noch tot gheenre tijt. voor dat ic margrieten mijn schoone sustere vonden hebbe. die wi so onnoseliken verloren in die iacht. iae wildijt mi consenteren. Daer op die vader antwoorde ende seyde. o heyndrick sone ick vreese voor u messchien. mer niet te min. neemt schats ende goets ghenoch. ende vaert soecken u lieve sustere margrieta. ende wacht u altoos voor die verraders. achtervolghet reynicheyt. eert reyne vrouwen. behoet weduwen ende weesen. vreest uwen god. sijt rechtverdich in al u doen. den vrouwen doet genade diet begeert. geeft gaerne om gode. hoort misse devotelic. vliet alle vijleynen. betaelt wel waer ghi vaert oft keert. so salmen eer van u spreken. wreect altoos gods lachtere op donghelovighe. In corporeert ende onthoudt dit heyndric sone. so werdy gheeert waer dat ghi comt. ofte in wat landt dat ghi sijt. ende onthout dit wel. Heyndric sprac. vader ic meen dat ic so doen sal. datmen achter mi gheen schande spreken en sal. noch blame den lymborchschen lande. Den leeuwe van kele int velt van parlen sal ic so suver houwen. dat mi in nae comende dagen daer of srpeken sal. Met desen woorden nam heyndric soeteliken orlof aen sijn vader ende moeder. die hem versagen van schatte ende van goede. ende van al dat ghene dat hem van noode was. Ende reet wech als een coopman onbekent. in coopmans habijte. onder versien van goeder aersemeyre ende wapenrock die hem noottelic sijn soude. Aldus schiet heyndric van sinen vader ende moeder. ende ghinc dolen om te soecken sijn lieve suster margrieta.
Auteursrecht onbekend