si saten in groter ghenoechten. ende hy dede dat beveel vanden keiser. daer si alle toe bereet waren. ende ginghen met evac ter salen vanden keyser daer alle die heren vergadert waren om te banckenteeren. ende als si aldus over maeltijt saten. die keyser die grave/ etsijtes/ die keyserinne/ margrieta ende die gravinne. Doen seyde die keyser ortsa her grave. wat segt ghijs oft ic u bade om een bede. Soudt ghijse my ooc ontseggen. Daer op dat die grave antwoorde ende seyde. o keiser ende mijn over heere. die bede mach sule sijn ende dattet in mijnder macht is ick salse u consenteeren Doen sprack die keyser iaes. si is wel in uwer machten. ende ten sal u niet schaden. noch ten sal u verlies niet sijn. Als dat die grave hoorde soe vraechde hi wat die bede was. Doen sprac die keyser daer si saten in vruechden etende ende drinckende. hier is margrieta die over schoone maecht van lymhorch gheboren. si staet soe wel in mijnder gracien. ende ooc mede in mijns dochters gracie. dat icse daer omme begheer te houden in mijn pallays. by eresebia mijn alder liefste dochtere. Daer op dat die grave van athenen antwoorde ende seide. o ghenadige keyser ende heere. ghy bidt omme dat ghene daer ick gheen macht over en hebbe. want si is haers selfs. ende ick en hebbe over haer heeten noch verbieden. aldus so is dat buten mijnder machte. Met dien so sprac etsijtes. heer keiser cesseert van dier beden. want margrieta die en staet ons niet af. wi en willense also niet quijt sien. want si is die ghene daer wi ons solaes in rapen, si is mijn hoope ende mijn troost. soudt ghijse mi dan willen ontrecken ende wten oghen houwen dat en soude mi niet lief sijn. wi willense selve houwen ende voerense van daer icse gebrocht hebbe. Daer op die keyser seyde. ick meene dat ghi en sult. want ic salse houden tsi lief ofte leet laet sien wiese mi nemen sal. Doen seyde etsijtes wil ic u seggen ghi oude grijsaert. siet wel wat ghi doet. soudt ghijse mi willen fortselic nemen. daer mijn herte op
rust. bi den bloede dat soudy becopen. Ende etsijtes die trac sijn mes wter scheeden ende hi wonde den keiser slaen. mer die heren schooten tusschen hem beyden. Die keyser en was niet gram. mer hy woude etsijtes proeven wat hi door margrieten doen soude. doen sach hy wel dat hijse herteliken lief hadde ende liet passeren. Margrieta stelde etsijtes te vreden ende seyde. o lief weder ic hier hen ofte in athenen is dat niet alleens. als ick u ghetrouwe blive. ghi weet ooc wel hertelic lief dat mi u moeder niet wel en vermach. aldus ist beter dat ic hier in des keysers hof blive bi sijnder schoonder dochter eresebia. ende achter volghen den aert van edelheden. ende aldus payde si etsijtes. Die vader van etsijtes die grave badt den keyser dat hy hem niet belghen en woude. alsdat sijn sone die fortse bedreef. Daer op die keiser seide, trouwen neen ic. ic en belghe mi niet. want dat is die slechte blintheit vanden ghenen die ghedroncken hebben van venus soope. Ic weet al wel. want ic hebber hier voortijts ooc also gheweest. dus gheve ict der ioncheit toe. ende der schieloser minnen Doen dancte die grave den keyser seer. dat hijt also haest vergaf. Ende doe riep die keiser etsijtes dat hi bi hem soude comen sitten. daer op dat etsijtes doe antwoorde ende seyde. neen heer keiser bi uwer werden, ic sitte wel. Die keyser seide. ic wil dat ghijt doet. dus ghinc etsijtes neven den keiser sitten ende salueerde hem. Die keyser seyde ortsa. etsijtes ionghelinck ghi doet quaet dat ghi teghen mi bestaet. want over peynst ende denct die eere ende die weerde die margrieta hier gheschien mach. peynst dat si blijft in een hof van eeren. daer si alle edelheit leeren mach Ende al blijftse hier ende ghy haer liefde draecht. si en is u niet ontverst. want ghi moechter gaen ende comen alst u believen sal. want mijn keiserlic hof staet voor u open. Als etsijtes des keysers soete woorden was hoorende. doe was hi te vreden. ende hi badt heer keiser nadat si hier bliven moet. so begheer ick dat
haer nyemant en mesdoe. oft neen het soude mi leet sijn. ende dat souden die sulcke becopen dier raet of daet toe gaf. Doen sprac die keiser. etsijtes ionghelinc die margrieten mesboode oft mesdede. in eenigher manieren contrarie der edelheit. dat soude ic selve wreken naest mijnder macht. ende keeren dat also ic schuldich ben. ic salse houden als
Auteursrecht onbekend