Volksboek van Margarieta van Lymborch (1516)

Hoe die gravinne raet sochte. om dat margrieta bliven soude biden keiser om datse etsijtes vergheten soude.

Dat. XXXV. capittel.

DES smorgens ginc die gravinne al peynsende hoe dat sijt aen legghen mochte. dat margrieta bleve int hof vanden keyser. ende dat sise so ontslagen ware. niet teghen staende datter haer leet af comen soude haddet etsijtes vernomen dattet bi haer schulde toe quaem Dus gaende dochte si in haer selven overmits den

[p. 33]

bosen viant diet haer in stac. dat si soude gaen aenden keyser ende bidden hem een bede. want die keyser was haar neve. aldus hadt sijt bat te doene. Ende si wist ooc wel dat des keysers dochter margrieten behert hadde ende dat sise wel wilde behouden bi haer om alle manieren vander naelden ende vander laden te leeren. daer margrieta meestersche af was Doe die gravinne stont in dese gedachten. so quam die keiser in haer gemoet. ende die gravinne viel hem al knielende te voet. ende si grueten hueschelick. Die keyser ontsaris van griecken dancte haer der huescher talen ende hi seide. staet op. wats u begheren nichte. dat ghi voor mi aldus knyelt. die sake moet swaer sijn die ghi voor handen hebt. Daer die gravinne op antwoorde ende si seide. die sake is swaer ende niet te swaer. ic soude u wel willen bidden om een bede. Die keiser seide wat beden ist. sulc mach si sijn ic consenteert ende sulc ic en consenteerse niet. segt my wat die bede is O keiser ende neve seide die gravinne. hier is myn sone etsijtes die is also versot op margarieta van lymborch. dat hi niet en weet wat hy doet so raest hi op haer. ende dat om haer scoonheit. ende here si is arm van goede ende onedel van gheslachte. eens coopmans dochter. peynst ofte mi dit wel hant. dat hijse begeert te trouwen wien lief wien leet. Dus soude ick u bidden om dat by haer vergeten soude. dat ghijse hielt binnen uwen hove. ende bidden den grave dat hise u liete bi uwer dochter om alle edelheyt te leeren. ende ooc om datse etsijtes vergheten soude. Die keiser dit horende dacht in hem selven dat die quade gravinne die maecht margarieta niet wel en vermochte. so si ooc en dede. want haar wercken betoondent. ende hi seide tot haer. hoort nichte ghi hebt groot onghelijc. dat ghijt wijten wilt margrieten. ten is haer schult niet Ic heb hier voortijts ooc gemint. ende mijn sinnen geleyt aen die ghene die neerder was dan ic van geboorten. soude men dat ghewroken hebben op die maecht ofte vrouwe diet was. ic hadde mesdaen gehadt. Aldus ghi hebt u eens mesgaen aen margrieten dat u vergheven is wacht u die tweeste reyse van mesdoen. Doe seyde die gravinne. ic en wil haer niet mesdoen. ic en begheer maer dat ghi margarieten van lymborch bi u houdt. ende datse mijn sone etsijtes niet meer en siet. want men seit. die wten ooghen is. die is ooc gans wter herten. Die keiser seide. ic salder af spreken als wi vergaderen. ende margrieten hegeren bi mi te bliven aenden grave om te horen wat dat etsijtes voorhem heeft ende in sinen sin. Dit die gravinne horende dochtet haer seer goet sijn. ende si dancte den keyser dat hi so veel om haer doen wilde. Ende met dien schieden si van malcanderen elc ghinc in sijn ruste.