Volksboek van Margarieta van Lymborch (1516)

Hoe dat den ternoy ghehouden was ende hoe dat etsijtes ende evac den danck ende den prijs hadden.

[14] Dat. XXXIIJ. capittel.

DOEN den nacht vergaen was ende den lichten dach aen quam so ghinc men misse doen nae die costume ende ghewoente vanden hove. ende elc stelde hem om te horen den dienst ons heren. Als den dienst gedaen was so ginc men ontbijten eten ende drincken elc nae sinen staet. Ende die edelingen die den prijs meenden te verdienen ghinghen hem stellen ende bereyden om cierlicste te comen inden ternoye. om prijs ende eere te behalen. Als die heren ende die vrouwen gheten hadden so ginghen si om te sien wie den prijs verdienen soude. Die keyser ghine boven op sijn pallays liggen met sinen state. des keisers dochter ghinc met haren state ter stellagien waert. margrieta van lymborch nevens haer side. daer sloeghen die trompetten ende die heranten riepen elckerlijc ter banen om prijs te verdienen. Daer quam die coninc van crackouwen wel gewapent in die bane. ende die coninc van napels. ende si sloeghen ierst op malckanderen met dallen fellic. dat een herte lusten mocht diet aen sach Die coninc van armenien sloech op den hertoghe van calaberen. Etsijtes die sloech op den hertoghe van poelgen. Evac sloech op den prince van constantinobele. soe dattet duerde wel drie uren lanc. Ten laetsten werden si al slaende over hoop. val goet heb goet want elc sinen man ontdeysde ende vreesde Etsijtes sloech den hertoge van calaberen vanden paerde dat hi tumelde int sandt. ende evac sloech den prince van constantinobele dat hy lach in onmacht teghen die aerde. Dit wilden die ander wreken. ende si quamen op hem beiden op etsijtes ende op evac. die coninc van crackouwen sloech op etsijtes. ende die coninc van napels op evac. also dat si so lange vochten dat si haer swerden ontstucken sloegen. ende men moste hem ander swerden gheven dat haesteliken ghedaen was Als si aldus ander swerden hadden sloeghen si op malcanderen vele seerder dan te voren. sodat etsijtes den coninc van crackouwen sloech dat hi zeech ter eender siden van sinen paerde. so datten sijn heren op hieven oft hi hadde gevallen Ende men sloech sijn helmet op om hem te vercoelen. ende men gaf hem cruyt inden mont. sodat hi bequam ende seide. wel moet hi varen die mi so dapperliken geslaghen heeft. wel vare sijn herte. hi is weert datmen hem prijst. ende dat om sijn curagye. want ic en vant noyt man die mi verduerde int slaen. dan hi alleen die mi tonder gheslaghen heeft. wie is die man. Doen seiden hem sijn heren. een ionc man. des graven sone van athenen hetende etsijtes. Doe verblijde die coninc van crackouwen in sinen moet dat hem die ionghe grave so tierende was ende bleef voort siende hoet varen soude Evac ende die coninc van napels vochten seer. ende etsijtes ter ander siden weder op den hertoge van poelgen. die etsijtes oock velde int sandt. so datter nijt began te comen soot costumeliken is. want die

[p. 32]

baenrotsen ende ander heren die comen waren metten hertoghe van calaberen ende poelgen begonsten al op etsijtes te slaen. also dat hy verlast was. margrieta dit siende was voor hem beducht. Evac hadde den coninc van napels tonder gesmeten. ende hy sach dat si alle op etsijtes sloeghen. ende die coninck van armenien sijn oom sacht ooc. dese twee quamen ghereden inden hoop als helsche vianden slaende inden hoop Daer werter vele onder die voeten gesmeten. so dat etsijtes ontset wert. ende hi sloecht al ter aerden dat tegen hem quam so dat die heranten tusschen beyde ghinghen ende riepen etsijtes etsijtes. als die den danc ende den prijs verdient hadde. Doen die keiser dit sach dattet also te wercke ginc. dede hi aersepone roepen het is ghenoch. ende dat elck rijden soude tsijnre herberghen waert. ende comen tavent ten banckette. Die herauten deden dat beveel vanden keyser. ende dien ternoy wert daer eerlic ghesceyden. ende elc track int sine daer hi behoorde. Ende margrieta ende des keisers dochter bleven bi een. ende ordineerden om den prijs te gheven den ghenen. dien alder beste verdient hadde inden ternoy.