Dat. XXXIJ. capittel.
DES morghens als den dach af quam. ghinghen die herauten ende haelden die maechden ende die vrouwen om te comen ter tafelen om tontfane die verwapeninghe vanden coningen/ hertogen ende graven. ridders ende baenrootsen die daer ternoyen souden om den prijs. Inden iersten ghinc ter tynnen des keysers dochtere. die welcke ontboot margrieten van lymborch bi haer te comen met haren maechden. al so ginghen die herauten om margrieten. ende si haelden haer by der keyserinnen daer margrieta minlijc toe bereet was. ende si quam ter tynnen bi der keyserinnen eresebia diese minnelijc ontfinc. Daer ghinc margrieta sitten bi der ionger keiserinne. ende die herauten stonden bereet beneden op een stellagie. ende dat om tontfaen die wapenen vanden heeren dier quamen ter vesperyen. Doen sloeghen des keysers trompetten op. ende al daer quam ghereden die coninc van armenien. ende hi bracht sijn wapen ter taveele vanden maechden. als die ternoyen wilde omme den prijs. Margrieta die hinc sijn wapen wten name vanden keyser aent taveel Doen quam aldaer ghereden die coninc van crackouwen. ende die presenteerde den herauten oock sijn wapen. om al daer te hangen ter tynnen bi den maechden. dwelc also gedaen was van margrieten. Doen quam die coninc van napels ende brach tooc de gelike sijn wapen. als die coninghen van te voren Doen quam die hertoghe van calaberen ende die hertoge van poelgen. daer nae so quam die grave van athenen. doen quam etsijtes seer costeliken te paerde ende hi presenteerde daer ooc sijn wapen ende dat nae wapen recht. hi besach seer die schoone vrouwen. mer meer nae margarieten dan alle die ander. Die herauten namen sijn wapen. ende si gavense margrieten diese seer besach ende si hincse bi des vaders wapen Doen quam al daer ghereden evac etsijtes neve. ende hy presenteerde al daer oock sijn wapen den herauten. ende die gaven se margrieten om te hanghen by die ander wapenen dat also gedaen was Doen quamen alle die baenrootsheren ende brochten ooc elc sijn wapen ten
taveele waert. dat seere cierlick om sien was. want die vesperye duerde van den thienen tot des savonts ten sessen toe. eer dat die vesperye gedaen was Mer dies banckenteerden si opten taveele. want die maechden ende die vrouwen waren daer seer eerliken gedient van menigherhande costeliker spijsen dat welcke die mogende keyser alte mael dede doen. Ende als doen die vesperye ghedaen was. so ghinc die keyserinne ende margrieta ter salen bi den keyser. diese seer weerdeliken ontfinc Doen ghinghen si die handen wasschen ende droghen. om te bancketteren met grooter ghenoechten. ende daer bliesen die montfloeyten/ basunen/ claroenen trompetten/ schalmeyen/ ende allet ghene datter muysyken aengaet van spele was daer vergadert. Ter wylen dat die heren ende vrouwen ende die maechden aldus waren int banckenteeren ende in groter vruechden ende blijscapen. So was hem etsijtes ende evac sijn neve bereedende om al daer ten banckette te doene een costelike mommerye. als ghi horen sult. In den iersten waren daer vierentwintich toortsdraghers alle te samen ghecleet met fluweelen wambaysen doorsneden. binnen ghevoodert met gouden lakenen. datmen sach blincken door dat ghesneden fluweele. Die kousen waren root scharlaken, gheboort met swarten fluweele. Etsijtes ende al die mommers waren ghecleet met half silveren lakenen. ende met half gouden lakenen. ende dat silveren laken doorstict met oorfaveryen. Aldus quamen si metten toortsen voor hem lieden gaende tot dat si quamen voor des keisers pallays.
Auteursrecht onbekend