Dat. XXIIIJ .capittel.
AL loopt den cloot hy en is noch niet ten eynde, die somighe willen margrieten doen dooden dat hem qualick lonen sal. héet ic evac ick sal in haer hulpe sijn ende etsijtes mijnen neve laten weten wat ic ghesien ende al ghehoort hebbe, hoe datmen margrieten onnoseliken dooden soude dat schade waer en waert niet belet mer ic hope iaet. Evac aldus al coutende tegens hem selven quam so verre dat hi quam aent casteele daer etsijtes op was. ende etsijtes die quam hem teghen. ende hi hiet evac willecome ende hy vraechde hem ofter wat schuylde dat hy so haesteliken quam. Evac seyde o neve wat schuylen iaet. daer is wat schuylende dat u ende margrieten teghen gaet ende aen haer lijf gaet. Etsijtes dat horende wert seer tornich ende gram. hoe soude dat by comen dat margrieta sterven soude. dat geeft mi wonder wat is die sake. Evac seyde heere men betichse dat si u moeder heeft willen vermoorden om selve vrouwe te sijn vanden lande. ic hoorde etsijtes neve dats die rechtere metten iersten niet doen en woude ende weder seydet uwer moeder die oorsake is ende cause van al. want si woude. margrieten gedoot hebben om dat si u lief hadde ende ghi haer. dese woorden heb ic haer horen spreken dat sijse daer omme dooden wilt. Als etsijtes dit hoorde so werdt hi noch grammer dan hi te voren noyt was. ende hi swoer dattet die rechter becopen soude. ende hadde hi sijn moeder ghehadt si en soudts haer niet belooft hebben. Met desen tornighen moede so sijn si beyde op gheseten te paerde. ende hebben hem versien van dat ghene dat hem lieden van noode was. ende sy sijn ghereden in een bosschage staende bi dat gherichte. ende daer hebben si hem selven verborghen ghehouden totter tijt dat die rechter daer comen soude met margrieten omme te doodene. Dit was omtrent in die dageraert als die valsche richter vander stadt wt was om margrieten te halen wten prijsoene ende ghevanckenisse.
Auteursrecht onbekend