Dat. XVIJ. capittel.
ETSIJTES etsijtes nu sidy troosteloos alleen hier buten weten van liefden. Margarieta dijn lief en achtet dijns niet. Wat sal ic maken ic moet besterven. want gae ic/ stae ic/ ligghe ic/ slaep ic/ waeck ic/ altoes ben ick besich met haerder liefden. Ende liever dan ie dese quellinghe langer gedooghen soude ende verdwinen op niet sonder troost van liefde. daer ick haers niet en begheer dan in reynicheden. ende mi daer en boven versmaet. ic sal mi selven ontliven so ben ic der quellinghe quyte. ende sterve ter liefden van haer die mi versmaet. o ghi amoruese minnaers neemt exempel aen mi. gheeft u liefde over daer ghi liefde vint. ende hangt u sinnen niet daer ghi ongehoort blijft sterft niet duysentich doden. Met deser talen ende woerden track etsijtes sijn sweert wt sijnder scheeden. ende soude hem selven gedoot hebben en hadde ghedaen een ghetrouwe ridder hetende evac. die quam ten aen ganghe ende wranc hem dat sweert wter hant. ende als die lief hadde ende noode soude gesien hebben sijn mesquame. ende seide tot hem. O lieve gheselle wat hebdi voren wat wildy maken. sidy dul oft sot. suft ghi oft raesdy. waer om wildi u selven dat leven nemen. wat dinghe is uwes sins segt mi wat u lettende is. Etsytes comende tot hem selven versuchte. Doe seide evac. o here ende mijn vrient claecht mi uwen noot waer omme dat ghi sijt in deser desperacien. dat ghy u selven doden wilt. oft wat u ghebreect. heeft u yemant yet mesdaen segghet mi. ick sal dat so hogheliken wreecken datmen daer af spreken sal over iaren ende daghen. Doe antwoerde etijstes evack. mijn ghetrouwe vrient ten is ghenen noot ic en beghere gheen wrake. waerder yemant die mi vercorte of te na dede ic soudt selve wel dorren wreeken. ten waer ghenen noot dat ander lieden wreken souden mijn mesval. Doe sprac evac. ic kenne lieve heere ende neve dat dat waer is. Mer nu bid ic u over mijn knyen op alle vrientschappe die ic u oyt ghedaen hebbe ende noch doen sal dats dat ghi mi doch segghen wilt dat last uwer
herten. Ic sie ende ic mercke aen u aenschijn ende aen dijn veranderinghe dat ghi ghequelt sijt van minnen. Aldus bid ic u etsijtes mijn lieve weerde neve dat ghi mi doch segghen wilt die rechte sake ic salder u in raden al waerdi mijn broeder. ende u ontlasten van swaren laste die uwer herten verweecht. Als etsijtes dese troostelijcke woorden hoorde van evac sinen neve so seide etsijtes. o evac lieve neve tis ware het is liefde die mi dus tormenteert. ende die my brengt in desperacien. want die ic minne die acht mijns als gebroken scherven. Doe sprac evac. o lieve neve wye is die vrouwe ofte maecht die u liefte versmaet. dat geeft mi vremde ghy die een verbeyder sijt van vele landen ende steden. wie is die vrouwe segt mi doch dat. Etsijtes seyde ende antwoorde. het is margarieta van lymborch die hier int hof onthouden is met mijnen vader ende moeder. dese heeft mi troost ontseyt ende mijn liefte versmaet. ende met pruesschen moede van mi ghegaen. dat mi seere speet ben icx weerdich te versmadene. Doen seide evac neen ghi niet. mer here ghi moet verstaen ende overpeysen dat margrieta gelijc heeft dat si u liefte ontseyt heeft ic sal u die reden waer by segghen. Een maecht die haer selven over gheeft ten iersten versoecke, men seyt gemeenlic dat sijs meer geploghen heeft dan eens Dus excuseer ic margrieten van deser saken. ende segghe dat si wel ghedaen heeft. ende dat si haer eer bemint boven silver oft gout. oft al dat in die werelt is. Mer heere daeromme en suldi niet laten haer goede ionste te draghen. want haer schoonheyt is weerdich dat mense begracyen moet. ende dat doen haer duechdelijcke zeeden ende goede manieren. Ick en can anders niet ghemercken si en is van edelen gheslachte gecomen. al seyt si dat een coopman haer vader is. ghy sulter noch anders af vernemen. het leyt mi also inden sinne. Etsijtes horende dese troostelike woorden van evac sinen neve wert wel ghetempert. ende hi dancte evac van sinen trooste. ende seyde neve ghi segt waer. ic kenne dat
ic onghelijc hebbe op margrieten. want hadse haer selven tot my ghegheven ic hadde gepeyst so ghi mi vertelt hebt. dus wil ic op hoepe gaen leven ende bieden haer
Auteursrecht onbekend