Volksboek van Margarieta van Lymborch (1516)

Hoe die hertoghe claechde dat verlies van sijnder dochter teghens sijn heren ende vrouwen. ende hoe haer figure ghestelt was voor die poorte.

Dat. X. capittel.

MIJN heeren te samen comt helpet my beclaghen dat groot verlies van margrieten mijnder weerdigher dochter. Die ick verloos onnoselic in der iacht. ende wat ridders wat mannen van wapenen dat ic

[p. 10]

gesonden hebbe om mijn schoone dochter si keeren al weder. ende nyemant en hoort oft en verneemt van haer dat mijnder herten hardt om te verdragen is. Ende bi deser saken heb ic doen maken dit over schone beelde. dwele dat ghefigureert is nae mijnder weerder dochter. Ende dese salmen stellen voor die poorte van mijnen hove dat een yegelic sien mach haer maecsele. oftse yemant bi aventueren yewers saghe daer si gedoelt ware dat hise hier beweghen mochte. hi soude voor sinen loon hebben. C. merc silvers. Die heren seyden te samen, o edel hertoghe van lymborch ghi doet seer wel. beteren raet en was noyt gevonden. iae om u dochter te crighen. want alst elc vernemen sal datter so vele toe staet. een yeghelic sal staen om te verwerven die. C. merck silvers dyer op gestelt sijn. Ende heet ic everaert een ridder van aventueren ic salder na gaen sien. Coenraert een ander ridder seide ooc des ghelicx. Dus was dat beelde ghestelt voor die poorte vanden hove van lymborch daer heren ende vrouwen bi stonden diet sagen. ende voort al die gemeente vander stadt quam gelopen om dat beelde te siene. ende een yegelic beclaechde dat verlies van margrieten. ende dat om haer grote duecht ende omme deerbaerhede die in haer was. Die moedere was seer druckich om haer dochter. des ghelicx ooc die vader. ende al die ghemeente vanden lande van lymborch. ende heindric haer broeder boven al. Dus was dat beelde van margrieten seer besien. ende met allen seer beclaecht.