[ 2 ] Dat vierde capittel.
O MARGRIETA nu staet u bedroevet te sine. want vader ende broeder en comen niet dies ic wel claghen mach. noch niemant vanden heeren. dies is mijn maechdelic herte seer bedroeft. dat ic van niemant en verhore. O allendighe maecht wat dinge sal ic beginnen. die duysterheit comt sterckelic aen. ende ic ben so verdoelt in dese bosschagie ende soe diepe daer in dat icker niet wt gheraken en can. ic vreese mi voer dese wilde dieren. ofte datter eenighe rovers in mochten schulen die mi beroven mochten mijn maechdelike suverheit, wat sal ic beghinnen. o schone Maria staet mi doch by. weest in mijnder hoede. ic sal best op desen boom gaen climmen. ende nemen daer op desen nacht mijn ruste. want ic en can niet voorder. daer hope ic dan bewaert ende beschermet te sine vanden wilden dieren. O margrieta dit sidy onghewoen. dat eens hertoghen dochtere edele van state rijck ende machtich haer ruste moet nemen in desen wilden woude. o moeder dus mochte uwen drome wel waer vallen dat u liefste goet gestolen was vanden dieven. o fortune is dit dijn doen. o vader ende broeder waer moechdi gevaren sijn. wist ghy u kint vader in desen druc het soude uwer herten deren. o broeder heyndric of ghi mi wist in desen swaren drucke. het soude uwer herten deren. o broeder heyndric oft ghi mi wist in desen weenen u ionck herte soude seer tonvreden sijn. Adieu vader/moeder / ende broeder. adieu alle mijn vrienden ende magen te samen. hier blijft margriete verdoelt int wout climmende op desen boom wt vreesen der doot beidende na den dach. o heere sendt mi alsulcken stercheit in. dat ic desen nacht over waken mach. want sliep ic. ic viele doot. ick bevele mi gansliken lieve heere in dijnder ghenaden.
Auteursrecht onbekend