[ 1 ] Dat. IIJ. capittel.
ORLOF vrouwe den claren lichten dach comt aen het is tijt. ick wil met mijnen sone ende met mijnder dochtere ter iacht. omme te vanghene hart oft hinde. bidt voer ons god almachtich om een goet aventuer te hebben. Die vrouwe seyde here ende man sinte Bernaerts geleye moet bi u sijn. sint Jans vrientschap ende sint Geertruyts minne. Ic en werde niet te vreden voor ic u weder sie met mijnen oghen ghesont wel varende. want droom heeft my ghequelt also datter twee dieven quamen ende stalen my mijn alder liefste ende weerste goet. bi desen drome is therte tonvreden. Die hertoge antwoerde. o weerde vrouwe mijn hope mijn troost mijn toeverlaet sijt gherust van herten. die heere. die is boven alle heeren. ende voer ons sterf op den berch van calvarien den alder scandelicsten ende versmadelicsten doot die sal ons allen wel behoeden ende beschermen van eenigher quader infortunen. want die barmherticheit des heeren die is also groot datse onverganckeliken ende sonder eynde is. Margrieta seyde. o lieve waerdighe moedere sijt wel te vreden ende gherust van herten ende maect eenen goeden moet. want wi sijn vele. mijn vader ende alle sijn edelen. Heyndric mijn broeder met sinen ionghers. ons en mach niet messchien. dus namen si suetelic orlof. ende sceyden vanden anderen. rijdende nae die woestijne. Die iaghers vernemende dat haer lieder prince quam. blies elc sinen horen. Die hertoge sprac laet bespoeren twilt. laet lopen bracken ende winden ghi iaghers. elc stelle hem ter wachte Heyndric lieve sone mijn. ende mijn weerde dochter margriete. siet nu die plasanee vander iacht. ende wat iaghen in heeft. siet daer hoe die honden bespoert hebben eenen schonen hart. ende hoe si hem aen hanghen. Margrieta seyde. o vader heere soe en sach ic noyt dinck dat mi badt behaechde. dat herte gaet mi open dat ic die honden soe gierich sie om den hart lopen. deen voer. dander achter. die derde ter siden. hi en is nieuwers vry. Doe antwoerde die vader dochter ghi sulter noch wat nyeus af sien.
hi neemt sijn loop na die riviere om hem te vervaerschene. daer suldi sien die natuerlichede vander iachte hoe dat hem die bracken en waer houden ende volghen sullen. Met deser talen en ander woerden hadde heyndric des hertoghen sone den evere op gedaen so dat hi sijn dreve nam. daer die hertoghe stont ende margriete sijn dochtere. Die hertoghe trat van sinen paerde ende meende den ever te stekene. maer hi ontbrac hem. dies hem die hertoge volchde soetelic after na. onder wegen vant hi een hart daer hi oec na ginc. so dat hi verdoelde in die woestijne. Alle die heren waren verstroyt. en margrieta bleef alleen aen die riviere. niet wetende waer haer vader ende haer broeder vervaren was. ende den dach ginc wech ende den nacht quam aen. dies si seer bedruct was. Die hertoge vast volgende bedaechde dat hi niemant en vant van sinen heren. noch sijn sone noch sijn dochter seggende. O vaderlic god vol alder ghenaden waer ben ic. ende wat is mijns. al mocht mi baten alle die werelt root van goude. wt deser bosschagien en can ic niet geraken. ic en hoere roepen noch blasen achter noch voren o heyndric sone waer sidi ghevaren. o mijn weerde dochtere hoe ist met u ghi en weet niet waer ic ben. noch ick en weet niet waer dat ghi ghevaren moecht sijn. ic vreese voor u ioncheyt oft u die dieren onversiens mochten hinderen oft deren. Mijn vaderlic aen schijn moet met tranen bedout sijn. O iacht vermalendide iacht ick mach u wel haten. ic en weet hier noort. oost. suyden. oft west gaen. tis hier te woeste. die
Auteursrecht onbekend