Dat ierste capittel.
DOEMEN screef duysent drie hondert ende thiene. in des Keysers Kaerle des caluus tijde. was een Hertoghe van Lymborch gheheten Otto. ende sijn edel huysvrouwe van lymborch die hadden te samen eenen sone hietende Heyndrick van Lymborch. ende een dochtere hietende margrieta van Lymborch. Dese hertoghe Otte was beladen mit groter fantesijen. ende om sijn swaerhede te verdrivene was sijn natuere gheneycht om na wilt te iaghene inder woestijnen. na harten/ hinden/ oft everswijn. Heyndrick sijn sone dit horende. ende Margriete sijn sustere. dat die hertoghe Otto haer vader geneycht was ter iacht te varene. vielen si beyde op haer knyen seggende. O vader here nu bidden wi u om mede te varen inden woude om aldaer te siene die triumphe. ende die melodijnshede vander iacht. ende den loop der honden na die wilde dieren. so dat ic heer vader mach leeren den aert van edelheden. ende dat mijn suster Margrieta mach sien die solaesselike melodije die daer in geleghen is. Daer op die hertoghe Otto antwoerde tot Heyndric van lymborch sinen sone. segghende Heyndric lieve sone mijn. ghi sijt noch teer ende seer ionc van daghen. ende margrieta u suster mede. Mijn schone dochtere ic vreese voor u oft u yet mesquame. oft enich dier oft wilt uwen leden yet crencken mochte mits dat ghi noch beyde seer ionck sijt. ende onghewone ter iacht te varene. Doen seyde Heyndrick van Lymborch. o vader heere ic soude mi selven verfoyen soude ic van harten/ hinden/ beren/ oft everen vlyen. Laet mi doch proeven mijn ionghe leden wat si doen connen teghen wilde ghedierte. Och iae seide margrieta lieve vader laet ons beyden u consent gheboeren dat wi die iacht bemercken moghen. ons ionghe natuer heefter begheerte toe. dus bidden wi u oetmoedelic. dat ghi vaderlike liefde baren wilt aen u kinderen. Die vader dit horende haer beider vierigher begheerten seyde. staet op mijn kinderen beide. rijst vander aerden. ic consenteer u mit mi ter iacht te varen morgen ten iersten daghe. aldus Heyndric sone gaet
totten iaghers ende segt hem dat si alle saken bereeden om iaghen so daer toe dienen mach. Heyndrick seyde. vader heere al uwen wille die sal gheschien. ende Heyndric ginc totten iaghers waert.
Auteursrecht onbekend