Liber Magstri Avicenne

[44]

Eeen plaester van orient dat maect men dus. Nemt tarwen bloeme enen lepel vol ende tempertse in wine gelijc oft ware wellinge. ende dan stellent opt vier in ene panne. ende dan doeter toe wit harst also groet alse .4. haselnoten. ende swert pec also groet alse .1. haselnot. ende ziedent tote dicke wert ende altoes roerende opt vier. Ende dan doent vanden viere altoes roerende tote dat cout es ¶ Ende wet dat meester lancfranc dese salve visierde. Ende eist dat tplaester te dicke vallet men maecht dunnen. Ende oec dicken eist te dunne. Dit plaester heilt zere wonden. ja eist datmen der met ene wieke bestriken wille ende mense steke in die wonde. ende diepe gesteken es ja enen. s. voet diep. ende vander zelver plaestren optie wonde leggen. het heiltse entie wieke bringet vor hare al dat etter dat in den bodem vander wonden es ¶ Ende wet datmen in dit plaester mingen mach

[p. 134]

op datmen wille alle manieren van dingen die zere heilen. of zere drogen. zere suveren. zere biten zere trecken. Of alle maniere van pulvere daer wonden of sweren. of cankere af te doene hebben. Ende si heilt alle maniere van ongemaken bi haer selven. ja die gedoodt siin. Ende si suvert van allen quaden vlesce. Men legtse oec enen dach ende enen nacht op een scorft hooft. ende derna trecse af. dan selen die hare int plaester bliven hangende so vaste houdet. Ende si trect oec sonderlinge wel Ende wet datse lancfranc priset herde zere

Ene ander zalve die lancfranc oec visierde. entie goet es op alle wonden. ende si rijpse ende doetse wel dragen ende si trect die materie uut diere onnutte es ende heiltse. Entie maect men dus. ¶ Nemt wit harst .1. s. lb. ende olie van oliven .5. o. ende was .3. o. dit salmen doen in ene panne. ende der toe salmen doen goeden wiin. ende dat salmen zieden ene goede lange wile. ende derna salment wel laten coelen. ende bescedent

Een plaester surgicum. hets goet iegen die milte die geswollen es Ende sijs goet met te heilne benen die ontwee siin. mer men en machse niet leggen int begin vander broken. mer derna mach mense der met heilen vander broken. Ende dit es om dat si andre humoren trecken soude ter quetsuren. Ende sijs goet op gefritseerde leden. ende op wonden. Ende optie swere vander borst die gebroken es. of gequetst es van stocken of van steken of van valne of van slagen. mer men mach dit plaester in die nuweheit niet leggen om datse humoren trecken soude van andren steden. Sijs oec goet in allen ongemaken dien trecken toe behort. ende si heilt zere. Ende wet dat

[p. 135]

se elc meester sculdech es te hebbene. ende men maecse dus ¶ Nemt galbanum. serapinum. armoniacum. oppopanac. elx .1. s. o. ende legse in warmen aysine te weike. dan nemt colofonie. dats griex pec .1. s. lb. mastic ende wierooc elx .1. s. o. dese drie pulvert wel elc bi hem selven ende bultse. Hier na doet .1. panne opt vier. ende doeter in .1. s. lb. aysiins. ende scep pec .1. lb. ende was .3. o. entie geweicte gommen. die salmen luttel zieden. ende dan perssen dor. 1. doec. ende dan weder doen opt vier ende ziedent tote die aysiin versoden si. Ende dan minct der in die poedre ende doet vanden viere. ende gieter op couden borne ende coelet. Ende dan die palmen besmeert met oliven walken die verscheit ute. Ende dan suverlike besceden. So eist zalve alst vorseit es