Liber Magstri Avicenne

[43]

Een plaester dat men heet die grote gracia dei. Het es goet tallen wonden also wel ten ouden alse ten nuwen Ende boven al essi vagende ende suverende ende oec vleesch te doen wassene. ja ende meer heilende in ere weken. dan alle andre medicinen doen in ere maent Ende noch sine laet geen quaet vleesch no vort vleesch in wonden wassen. Ende sijs goet den zenewen die gesneden siin of ontcrompen siin in wonden of in sweren Ende si trect alle maniere van gescutte

[p. 132]

weder ja op dat weder keren mach uter selver steden daert in gescoten was. Ende si es goet op steken. ende op beten van geveniinden dieren eist dat mense der op leit Si trecket tfenijn ute. Ende rijpt zere alle manieren van sweren ende heiltse sonder wieken. Si es goet iegen canker. iegen fistel. iegen moermael. jegen alle maniere van vulen zeren ende van vulen quaden sweren. Ende op clieren die wassen in den hals. want si suvertse ende heiltse. Ende si es goet optie sweren die wassen an die levere ende an die milte onder die rebben. ja op dat mense int ierste der op plaestert want si trecse int vleesch ende scortse ende heiltse. Ende dat orcont .1. meester dat hise leide op .1. hooft dat op geblasen was. entie zieke genas. Si es oec goet op spenen. Ende alse die meesters die waerheit willen lyen. so essi meer orbarlijc dan iemen mach begripen. want si es ongebrekelijc. ende haer werken siin geware werden vanden name enter heilecheit dat mense scelt gracia dei. Ende dese plastere maect men dus ¶ Nemt litargirum .1. s. .lb. ende 4. o. ende pulveret cleine. colofonie wierooc. scilt varwe. elx .1. s. o. dese pulvere wel elc bi hem selven ende sichtet dor .1. nauwe bultel. Ende hier na salmen alle dese pulvere te gadere stampen ende mingen. ende Ende dan doense weder lopen dor .1. bultel an dander zide. Dan nemt galbanum .1 .s. .o. ende armoniacum onder .s .o. mirre. bedellij. oppopanax elx .1. s. o. dese gommen salmen leggen in aysine te weyke ende alsi geweyct siin. salmen der toe doen wijn

[p. 133]

.1. luttel. ende dan zieden tote dat gesmolten es. ende dan perssen dor enen doec. ende suveren van sinen quade. ende dan doen opt vier in ene panne .1. s. lb. olien van oliven ende .4. o. was .1. s. lb. Entie gommen die in den aysine gesceden siin salmen oec in doen. ende .1. luttel zieden. ende dan doenre toe .1. s. lb. terbentinen ende latense smelten. Ende als die gesmolten es salmen alle die vorseide pulvere daer in mingen. ende dan wel suverlike besceden ¶ Men sal weten alle manieren van gommen die men niet pulveren mach. datmen die sal leggen in aysine. of in wine te weyke. ja eer dat mense op dat vier stellen sal