Liber Magstri Avicenne

[45]

Dese zalve maecte meester ian braemblat. Ende hi seit dat hise geeft tetene alse hi den gewonden verbonden heeft ende gedwagen met wine of met aysine. dan geeft hise tetene. ende men maecse dus ¶ Nemt hontsrebbe. cincwij smereworte. pinpenele. dese cruden sal men stoten ende tsap uut wringen. ende dan salmen dat past te viere doen met .4. .lb. cruce botren. dats botere gemaect binnen den drien dagen als men crucen draget. ende dan salment zieden .1. lange wile met zoeten viere. ende dan zien dor .1. doec. ende tpast wech werpen. Dan salmen nemen tsap datter uut gewrongen was ende ziedent metter botren ene lange wile

[p. 136]

met zoeten viere. ende dan vanden viere doen. ende gietent op couden borne ende latent coelen. ende derna salmen dwater uut drogen ende bescedent

Dese zalve scelt men ungwentum album ende si es wit gevarwt. Ende si es goet in wonden ende in fistelen ende in cankeren. want si heiltse ende droochse ende suvertse Ende so waer datmen enege dingen drogen wille. so salmen nemen dese zalve. Want si heilt alle vule vortege steden. ende droget alle versche gesingelde steden sonderlinge wel. Ende men maecse dus ¶ Nemt cerusa. .2. o. litargirum .1. o. ende pulveret wel. ende bultet dor .1. bultel. daer na doet in enen mortier ende doeter toe aysiin of rose water wel wrivende tegadere. daerna doeter toe .200. tarwen corne swer van wieroke. ende .liij. tarwen corne swer van mastike ierst wel cleine gepulvert ende gebult. ende wrivet wel metten vorseiden dingen. ende dan doeter toe over wat wilen olie van oliven. ende over wat wilen aysiin wrivende alse .1. sause tote dat dicke becomt. ende dan bescedet

Dese zalve visierden de .4. meesters Ende si es goet in heten tiden. ende in heten wonden. Si heilt ende droget wonden met goeden ettere. Men sal nemen litargirum ende pulverent wel. ende loodasscen gebernt van lode .1. s. o. ende die oec wel pulveren. ende wit van spaengien .1. s. o. dat salmen werpen in een mortier. daer salmen toe doen aysiin ende tempern te gadere tote dat dicke gnouch si. no te dicke no te dunne dan eist zalve.