[41]
Hier wille wi spreken van zalven of van plaestren. ende ierst vanden plaestere van jerusalem. ende dat maect men dus ¶ Nemt sap van betonien ene .5. pinte. ende ene hantvol pinpenelen ende en hebdi gene pinpenele. so mach men nemen .2. hantvol pilocellam. dats tcrudekiin metten hare dat plat opt aerde leget ende es ru met vele haers. ende ene hantvol agremonien. Dese cruden salmen stampen ontwee ende doense in enen pot ende der op gieten tsap vander betonien. ende ene halve pinte wiins so dattie cruden bedect siin. ende dan salmen den pot wel hullen ende stellen onder paerts mes .5. dagen. ende derna salmen uut doen ende wallent opt vier met wine. of so vele der toe doen dats der gnouch si. ende ziedent tot diere tijt dat de wiin versoden si ende dat salmen wel wachten. Ende dan salmense perssen dor enen doec wel nauwe. ende werpen die cruden wech. Dan salment weder te viere doen. ende doenre toe .1. s. lb. was ende .1. s. lb. warpout. Dit salmen zieden alte hope tot die cruden versoden siin. ja die sope daer af diere noch bleven waren. Ende dan werpen der in terbentine ende laetense smelten. Ende dan nemen die croppen vanden eglentiere met den zaden wel cleine gepulvert ende gebult dor .1. nauwe bultel. ende dese salmen mingen metten plaestere. Ende derna salmen op dat plaster gieten wijfs melc ende coelent der met. ende dan salmen tplaester nemen tusscen die handen ende wel walken iegen .1. vier die verscheit ute. ende men sal die handen wel bestriken met olien van oliven dat niet en cleve an die handen ¶ Ende dese plaestere es sonderlinge goet in hooftwonden. ende in alle wonden met te heilne. Ende wet datmen gene terbentine
Auteursrechtelijk beschermd