Liber Magstri Avicenne

[p. 127]

[40]

Uenteusen purgieren dat clene bloet dat in die cleine adren leget tusscen vel ende vleesch vele meer dan dat bloet laten doet ende dat sonder vaer ende sonder vrese ende daer omme eist goet den genen die geen groet bloet en hebben. Ende om dat venteusen werken diverselike so salic u seggen dien tijt dat men es sculdech te venteusene. Dat es alse de mane vol es in die middelt vander maent. Want die lieden siin dan alder volst van quaden bloede dan si siin in andren tiden. Die ure van venteusene dats te tierchen. of tusscen tierche ende prime ¶ Entie venteusinge die men doet ane de zide vanden hoofde. es goet den genen die sot becomen bi quaden saken. ende om apostemen ende om andre ziecheiden die comen in die vorgeseide lieden. Ende dit seit avicenna dat die venteuse diemen set in den necke vanden halse. dat si destrueert dat verstennisse. ja die hen daer doen venteusen. Entie venteuse die men doet an den hals cnoc ende ane den halse doet goet den scoudren. ende sijs goet iegen droefheit vander kelen ende vanden hals cnocke ende vanden ansichte Venteuse geset tusscen beiden scoudren es zere goet dien bloet spuwen ende quaet liim uten monde werpen. Venteuse geset onder den kin. purgiert die tanden ende dat roest ende dat gerne bloet ende al die kele ende al thooft ¶ Die venteusen diemen doet ane die ziden doen groet goet ant dicke vanden armen ende vanden scoudren nederwert die gene die ziecheiden hebben van dat si te vele pinen of andre ziecheit. Venteusen dien men doet vor die zide. doen goet den genen die hebben scorft vel. entie vol siin van

[p. 128]

quaden bloede in die handen ende haer handen cretsen ende crauwen entie hen hebben gequetst. ende vol siin van quaden rongen ende van vulen. Venteusen geset opten rugge siin goet iegen apostemen vanden dyen ende iegen quetsinge vander borst. ende iegen die es moroyde ende iegen die festels. ende iegen quade winden die comen in die milte Venteusen geset an die dyen siin goet iegen apostemen die comen in die cullen ende oec die comen in die been. ende iegen roengeuse been ¶ Entie venteuse buten den dyen siin goet iegen ziecheiden vanden fundamente. ende iegen die apostemen vanden hanken. Venteuse geset ant vette vanden bene es goet iegen quetsinge van der blasen. ende iegen de bedecte ziecheiden van wiven. ende iegen apostemen die comen vander ziden. Venteusen gedaen an die braden van den benen rumen dbloet van alden lichame Ende iegen apostemen ende andre ziecheit die men ontfanget. Venteusen geset onder die knoesele vanden voeten siin goet iegen deren vanden knien ende vanden hanken ende oec iegen die bedecte ziecheit van den wiven. of die ziecheit die si hebben van costumen ¶ Nu wet dat dese latingen gemaect waren om .3. dingen. Dierste es om te rumene elc led. Dander om dat si wachten souden den sin entie natuerlike hitte. Terde om datter gene vrese an en es daer men venteusen stellet in wat lede het es ¶ Ende wet dat die venteuse dienmen set sonder bloeden dat doet men om .6. dingen. Dierste es om te treckene die quade humoren dene vanden andren. Also als men pleget te leggene optie teyten of optie mammen. om te bedwingene die

[p. 129]

bedecte ziecheiden des wijfs. Dandre venteuse diemen set sonder bloeden. dats om uut te treckene die aposteme die te vele es gesonken. Die derde venteuse sonder bloeden. es om te treckene die apostemen vanden principalen leden ende oec ter nederster steden enter lievere steden. Die .4. venteuse es om te verhittene die stede dat si die humoren trecken souden ter venteusen. Die .5. es dat si die leden trecken soude te harer proper steden alse die budele die siin in der lieden buuc qualike bereit ende gequetst. ende gefritseert. Die seste venteuse die men set sonder bloeden. es omme die quetsinge vander magen ende vanden buke ende vanden scenen. ende marris die comt van quaden winden ¶ Ende men nes niet sculdech die venteuse te vele te houdene. mer .1. luttel te slage ende van vele in vele es men sculdech te houdene. ende oec so lange dat dbloet si suverlike uut getrect uuten lichame vanden mensce ¶ Ende alse men heeft die venteuse af gedaen. so es men sculdech die stede te suverne met enen natten clede in borne genet Ende wet datmen geen kint nes sculdech te venteusene beneden .3. iaren. mer boven. ¶ Nota. dat .10. tarwen corne es .1. halve scruple .20. tarwen corne es .1. scruple. als dit [volgt het symbool voor een scrupel] .40. tarwen corne es .1. dragma als dit [volgt het symbool voor een drachme] .8. dragmen es .1. once alse dit [volgt het symbool voor een ons] .16. oncen es .1. pont alse dit lb.